പ്രവേശനോത്സവം കളറാക്കും

p2 lead....... കോട്ടയം: രണ്ടുവർഷത്തെ ഇടവേളക്കുശേഷം ജൂൺ ഒന്നിന്​ വിദ്യാലയങ്ങൾ പ്രവേശനോത്സവത്തിന്​ ഒരുങ്ങുന്നു. പാഠപുസ്തക വിതരണം, സ്കൂളുകളിലെ അടിസ്ഥാനസൗകര്യം പരിശോധിക്കൽ, സ്കൂൾ കെട്ടിടങ്ങളുടെ​ ഫിറ്റ്​നസ്​ ഉറപ്പാക്കൽ തുടങ്ങിയവ പുരോഗമിക്കുകയാണ്​. ജില്ലയിലെ എല്ലാ സ്കൂളുകളിലും അതത്​ എ.ഇ.ഒമാരുടെ നേതൃത്വത്തിൽ പരിശോധനകൾ നടത്തി സൗകര്യം വിലയിരുത്തുന്നുണ്ട്​​. മാർച്ചിൽ സ്​പെഷൽ സ്കൂളുകളിലെ ഒരുക്കങ്ങളും സൗകര്യങ്ങളും വിലയിരുത്തിയിരുന്നു. സ്കൂളുകളിലേക്ക്​ കുട്ടികളുടെ പ്രവേശനം പുരോഗമിക്കുകയാണ്​. ജില്ലകളിലെ ഭൂരിഭാഗം സർക്കാർ, എയ്​ഡഡ്​ സ്കൂളുകളും ഹൈടെക്​ നിലവാരത്തിൽ ഉയർത്തിയതിനാൽ​ സ്വകാര്യ സ്കൂളുകളെ അപേക്ഷിച്ച്​ ഇത്തവണ കുട്ടികൾ അധികമായെത്തും എന്നാണ്​ പ്രതീക്ഷ. ജില്ലതല പ്രവേ​ശനോത്സവം കുടമാളൂർ ഗവ. എച്ച്​.എസ്​.എസിൽ​ നടത്താൻ ധാരണയായിട്ടുണ്ടെങ്കിലും അന്തിമ​ തീരുമാനമായിട്ടില്ല. പ്രവേ​ശനോത്സവത്തിന്‍റെ മുന്നൊരുക്കങ്ങളുമായി ബന്ധപ്പെട്ട്​ എല്ലാ പ്രധാന അധ്യാപകരും എ.ഇ.ഒമാരും ഉൾപ്പെടുന്ന യോഗം വരുംദിവസങ്ങളിൽ ഓൺലൈനായി ചേരും. കുട്ടികൾക്കായുള്ള ഉച്ചഭക്ഷണത്തിന്‍റെ മുന്നൊരുക്കങ്ങളും അവസാനഘട്ടത്തിലാണ്​. ഭക്ഷ്യസുരക്ഷ വകുപ്പിന്‍റെ നിർദേശപ്രകാരം എല്ലാ പാചകത്തൊഴിലാളികളും മെഡിക്കൽ സർട്ടിഫിക്കറ്റ്​, ഹെൽത്ത്​ കാർഡ്​ ഉൾ​പ്പെടെ സമർപ്പിക്കണമെന്ന്​ നിർദേശം നൽകിയിട്ടുണ്ട്​. സ്കൂളുകളിലെ പാചകപ്പുരകളും മറ്റും വൃത്തിയുള്ളതാണെന്ന്​ ഉറപ്പാക്കേണ്ടത്​​ പ്രധാനാധ്യാപകരുടെ ചുമതലയാണ്​. ------ അധ്യാപകർക്ക്​ പരിശീലനക്ലാസ്​ ക്ലാസുകൾ തുടങ്ങുന്നതിന്​ മുന്നോടിയായി അധ്യാപകർക്കുള്ള പരിശീലന ക്ലാസുകൾ അവസാനഘട്ടത്തിലാണ്​. ഓൺലൈൻ ക്ലാസുകളിലൂടെ പഠിച്ചിരുന്ന വിദ്യാർഥികൾക്ക്​ സ്കൂൾ അന്തരീക്ഷവുമായി പൊരുത്തപ്പെടാൻ ആവശ്യമായ സമയം വേണം​. അവരുമായ സമ്പർക്കം സുഗമമാക്കുകയെന്നതാണ്​ ഈ ക്ലാസുകളുടെ ഉദ്ദേശ്യം. ------- പാഠപുസ്തക വിതരണം പാഠപുസ്തകങ്ങളുടെ വിതരണം 60 ശതമാനത്തോളം പൂർത്തീകരിച്ചിട്ടുണ്ട്​. വരുംദിവസങ്ങളിൽ പുസ്തകവിതരണം പൂർത്തീകരിക്കാനാണ്​ തീരുമാനം. എല്ലാ വിദ്യാഭ്യാസ ഉപജില്ലകളുടെയും കീഴിലെ ഹബ്ബുകളിൽ പുസ്തകങ്ങൾ സംഭരിച്ചിട്ടുണ്ട്​. ഒന്നുമുതൽ എട്ടാംക്ലാസ്​ വരെ പാഠപുസ്തകങ്ങൾ അതത്​ ഹബ്ബുകളിൽ എത്തിയിട്ടുണ്ട്​. മഴമൂലം പുസ്തകങ്ങൾ എത്തിക്കുന്നതിന്​ കാലതാമസം നേരിടുന്നുണ്ടെന്നും അത്​ പരിഹരിക്കാൻ ശ്രമിക്കുകയാണെന്നും അധികൃതർ അറിയിച്ചു. -------- സഞ്ചരിക്കുന്ന​ ത്രിവേണി സ്​റ്റോർ കുതിച്ചുയരുന്ന വിലക്കയറ്റത്തിനിടെ സാധാരണക്കാരന്​ ആശ്വാസമായി സഞ്ചരിക്കുന്ന​ ത്രിവേണി സ്​റ്റോർ ശനിയാഴ്ച ഗാന്ധിസ്ക്വയറിൽനിന്ന്​ സർവിസ്​ തുടങ്ങും. മറ്റ്​ കടകളിൽനിന്ന്​ വാങ്ങുന്ന വിലയെക്കാൾ 20 ശതമാനം കുറഞ്ഞനിരക്കിൽ ത്രിവേണി സ്​റ്റോറുകളിലൂടെ പഠനോപകരണങ്ങൾ, ബാഗുകൾ, റെയിൻകോട്ടുകൾ, കുടകൾ തുടങ്ങിയവ ലഭ്യമാകും. ആഴ്ചയിൽ ആറുദിവസവും വിവിധ റൂട്ടുകളിൽ സഞ്ചരിക്കുന്ന​ ത്രിവേണി സ്​റ്റോർ സർവിസ്​ നടത്തും. ----------- വാഹന പരിശോധന കോട്ടയം: മോട്ടോർ വാഹന വകുപ്പിന്‍റെ ആഭിമുഖ്യത്തിൽ 25ന് സ്‌കൂൾ വാഹനങ്ങളുടെ ഫിറ്റ്‌നസ് പരിശോധിക്കുമെന്ന് ആർ.ടി.ഒ പി.ആർ. സജീവ് അറിയിച്ചു. അമ്മഞ്ചേരി- കാരിത്താസ് റോഡിൽ റെയിൽവേ ഗേറ്റിന് സമീപം രാവിലെ 10ന് പരിശോധന ആരംഭിക്കും. പരിശോധന പൂർത്തിയാക്കിയതാണെന്ന് സൂചിപ്പിക്കുന്ന സ്റ്റിക്കർ വാഹനത്തിൽ പതിക്കും. സുരക്ഷിത ഡ്രൈവിങ്​ സംബന്ധിച്ച മാർഗനിർദേശങ്ങളും ലഘുലേഖകളും ഡ്രൈവർമാർക്ക് നൽകും.