നിർമാണപ്രവർത്തനം: ഒ.പികളിൽ എത്തിച്ചേരാൻ കഴിയാതെ രോഗികൾ ബുദ്ധിമുട്ടിൽ

ഗാന്ധിനഗർ: മെഡിക്കൽ കോളജ് ആശുപത്രിയിൽ പുനർനിർമാണ പ്രവർത്തനം നടക്കുന്നത്​ രോഗികൾക്ക് തിരിച്ചടിയായി. വിവിധ ഒ.പികളിലെ ഡോക്ടർമാരെ കാണുന്നതിന് എത്തിച്ചേരാൻ ബുദ്ധിമുട്ടേണ്ട അവസ്ഥയാണ്​. പഴയ അത്യാഹിത വിഭാഗത്തിന് സമീപത്താണ് നിർമാണപ്രവർത്തനം നടക്കുന്നത്. അതിനാൽ ഒന്നാംനിലയിലും രണ്ടാനിലയിലുമുള്ള മെഡിസിൻ, ന്യൂറോ സർജറി, നെഫ്രോളജി, ത്വഗ്​രോഗം, നേത്രരോഗം തുടങ്ങിയ വിഭാഗങ്ങളിലേക്ക്​​ പോകാനുള്ള ചവിട്ടുപടികൾ നിർമാണപ്രവർത്തനത്തിനായി മറച്ചിരിക്കുകയാണ്​. സൂപ്രണ്ട് ഓഫിസിന്‍റെ സമീപത്തെ ചവിട്ടുപടി കയറി ഡോക്ടർമാരെ കാണേണ്ട അവസ്ഥയാണ്​ രോഗികൾക്ക്​. പഴയ അത്യാഹിത വിഭാഗത്തിൽ മുകളിലത്തെ നിലകളിലേക്കുപോകാൻ രണ്ടു ലിഫ്റ്റുണ്ടെങ്കിലും ഒരെണ്ണത്തിലാണ്​ ജീവനക്കാരൻ ഉള്ളത്​. കൂടാതെ നിർമാണപ്രവർത്തനം നടക്കുന്ന സ്ഥലത്ത് ആവശ്യമായ മറകൾ സ്ഥാപിക്കാത്തതിനാൽ പൊടിശല്യവും രൂക്ഷമാണ്.