ചിറ്റയം-വീണ പോര്​; 'എന്റെ കേരളം' മേള സമാപന ചടങ്ങ്​ സി.പി.ഐ ബഹിഷ്​കരിച്ചു

പത്തനംതിട്ട: ഇടതു സർക്കാറിന്‍റെ ഒന്നാം വാര്‍ഷികാഘോഷത്തിന്റെ ഭാഗമായി ജില്ല സ്‌റ്റേഡിയത്തില്‍ സംഘടിപ്പിച്ച 'എന്റെ കേരളം' പ്രദര്‍ശന വിപണന മേള സമാപന ചടങ്ങ്​ സി.പി.ഐ ബഹിഷ്​കരിച്ചു. ജില്ലയുടെ ചുമതലയുള്ള മന്ത്രി വീണ ജോർജിന്‍റെ സമീപനത്തോടുള്ള ഡെപ്യൂട്ടി സ്പീക്കർ ചിറ്റയം ഗോപകുമാറിന്‍റെ നിലപാടിനെ​ പിന്തുണച്ചാണ്​ ബഹിഷ്കരണം. മന്ത്രി വീണ ജോർജ്​ ഉദ്​ഘാടകയായ ചടങ്ങിലേക്ക്​ ചിറ്റയം ഗോപകുമാറിനെ കൂടാതെ സി.പി.ഐ ജില്ല സെക്രട്ടറി എ.പി. ജയനെയും സി.പി.ഐക്കാരനായ അടൂർ നഗരസഭ ചെയർമാൻ ഡി. സജിയെയും ക്ഷണിച്ചിരുന്നു. എന്നാൽ, ആരും എത്തിയില്ല. ​നേരത്തേ തീരുമാനിച്ച ചില പരിപാടികൾ മൂലമാണ്​ വിട്ടുനിൽക്കുന്നതെന്ന്​ പറഞ്ഞ ചിറ്റയം, ആശംസ അറിയിക്കാൻ കലക്ടറെ ചുമതലപ്പെടുത്തുകയും ചെയ്തു. സി.പി.ഐ ജില്ല എക്സിക്യൂട്ടിവിലെ തീരുമാനപ്രകാരമാണ്​ ജില്ല സെക്രട്ടറിയടക്കം വിട്ടുനിന്നത്​. മേളയുടെ ഉദ്​ഘാടന ചടങ്ങിലേക്ക്​ തന്നെ മന്ത്രി വീണ ജോർജ്​ ക്ഷണി​ച്ചില്ലെന്ന്​ ചിറ്റയത്തിന്‍റെ പരസ്യവിമർശനത്തോടെയാണ്​ നേതാക്കളുടെ കുറച്ചുകാലമായുള്ള ശീതസമരം മറ നീക്കി പുറത്തുവന്നത്​. വീണക്ക്​ പിന്തുണയുമായി സി.പി.എം ജില്ല സെക്രട്ടറി രംഗത്തെത്തിയതോടെ​ മറുപടി നൽകി സി.പി.ഐ ജില്ല സെക്രട്ടറി എ.പി. ജയനും തിരിച്ചടിച്ചു. രണ്ട്​ നേതാക്കളും ഇടതുമുന്നണി നേതൃത്വത്തിന്​ പരാതി നൽകിയിരിക്കെയായിരുന്നു ഇത്​. തർക്കം തീർക്കാൻ 22ന്​ ജില്ലതലത്തിൽ ചർച്ച നടത്താനിരിക്കെയാണ്​ ഇപ്പോൾ സർക്കാർ ആഘോഷത്തി​ന്‍റെ പരിപാടി തന്നെ പ്രധാന ഘടകകക്ഷി ബഹിഷ്കരിച്ചത്​. ഇതിനോട്​ പ്രതികരിക്കാൻ വീണ ജോർജ്​ തയാറായില്ലെങ്കിലും സമൂഹമാധ്യമങ്ങളിൽ അനുയായികൾ ചിറ്റയത്തിനെതിരെ രംഗത്തുണ്ട്​. വിഷയം സംസ്ഥാനതലത്തിൽ തന്നെ ചർച്ച ചെയ്ത്​ പരിഹരിക്കണമെന്ന നിലപാടിലാണ്​ സി.പി.ഐ. പ്രശ്ന പരിഹാരം ഉണ്ടാകുന്നതുവരെ ജില്ലയിലെ സർക്കാർ പരിപാടിയിൽനിന്ന്​ വിട്ടുനിൽക്കാനാണ്​ ചിറ്റയം ഗോപകുമാറിന്‍റെ തീരുമാനം. മന്ത്രിസഭ വാർഷികാഘോഷങ്ങളടക്കം ഇതു ബാധകമാണെന്ന് ​ ചിറ്റയം അറിയിച്ചു. മറ്റൊരു സംഭവത്തിൽ ചൊവ്വാഴ്ച നടക്കേണ്ട പത്തനംതിട്ട-ആലപ്പുഴ ജില്ലകളെ ബന്ധിപ്പിക്കുന്ന പുതുകുളങ്ങര പാലത്തിന്റെ ഉദ്ഘാടന ചടങ്ങ്​ മാറ്റിവെച്ചു. മന്ത്രി വീണ ജോർജിനെ അധ്യക്ഷയാക്കാത്തതിൽ പ്രതിഷേധിച്ച് മന്ത്രി ചടങ്ങ് ബഹിഷ്​കരിക്കുമെന്നതിനാലാണ്​ ഇത്​. മന്ത്രി റോഷി അഗസ്​റ്റിൻ ഉദ്​ഘാടനം ചെയ്യുന്ന ചടങ്ങിൽ മന്ത്രി സജി ചെറിയാനെയാണ്​ അധ്യക്ഷനാക്കിയിരുന്നത്​.