കെ- ഫോൺ പദ്ധതി യാഥാർഥ്യമാകുന്നു -മുഖ്യമന്ത്രി

തിരുവനന്തപുരം: കോവിഡ് മൂലമുണ്ടായ പ്രതിബന്ധങ്ങളെ മറികടന്ന് കെ- ഫോൺ പദ്ധതി യാഥാർഥ്യമാകുകയാണെന്ന്​ മുഖ്യമന്ത്രി പിണറായി വിജയൻ. ഗാർഹിക ഉപഭോക്താക്കൾക്ക് കണക്​ഷൻ ലഭ്യമാക്കാനുള്ള നടപടികൾ പുരോഗമിക്കുന്നു. സൗജന്യ കണക്​ഷനുകൾക്ക് അർഹരായ ഗുണഭോക്താക്കളെ കണ്ടെത്താനും അവ നൽകുന്നതിനാവശ്യമായ ടെൻഡർ നടപടികൾ ആരംഭിക്കാനും നടപടി സ്വീകരിച്ചിട്ടുണ്ട്​. സംസ്ഥാനത്തെ എല്ലാ സർക്കാർ ഓഫിസുകളിലും കെ-ഫോൺ നെറ്റ്​വർക്ക് നൽകും. ദാരിദ്ര്യരേഖക്ക്​ താഴെയുള്ള കുടുംബങ്ങൾക്ക് സൗജന്യമായും അല്ലാത്തവർക്ക് കുറഞ്ഞ നിരക്കിലും ഗുണമേന്മയുള്ള ഇൻറനെറ്റ് സേവനം ഉറപ്പാക്കുകയാണ് ലക്ഷ്യം. കഴിഞ്ഞ ഏപ്രിൽ 28 വരെയുള്ള കണക്കുപ്രകാരം കെ- ഫോൺ പദ്ധതിയുടെ 61.38 ശതമാനം നിർമാണവും പൂർത്തീകരിക്കാൻ കഴിഞ്ഞിട്ടുണ്ട്​. ആദ്യഘട്ടത്തിൽ ഓരോ നിയോജക മണ്ഡലത്തിലും 100 ബി.പി.എൽ കുടുംബങ്ങൾക്ക് കണക്​ഷൻ നൽകും സെക്കൻഡിൽ 10 മുതൽ 15 എം.ബിവരെ വേഗത്തിൽ ഒരു ദിവസം 1.5 ജിബി ഡാറ്റ സൗജന്യമായി നൽകുമെന്നും മുഖ്യമന്ത്രി പറഞ്ഞു.