കളിയാരവം നിറച്ച വാർത്തകളില്ലാത്ത ലോകത്തേക്ക്​ സിദ്ദീഖ്​​​ മടങ്ങി

പീരുമേട്: സങ്കടങ്ങൾ ഉള്ളിലൊതുക്കി പുഞ്ചിരിയോടെ ജീവിതത്തെ നേരിട്ട സിദ്ദീഖ്​​,​ കളിയാരവം നിറച്ച വാർത്തകളില്ലാത്ത ലോകത്തേക്ക്​ മടങ്ങുമ്പോൾ സുഹൃത്തുക്കൾക്കും നാടിനും അത്​ അടങ്ങാത്ത വേദനയാകുന്നു. വാർത്തകളുടെ സഹയാത്രികനായി, കായികവിശേഷങ്ങൾ ആവേശം നിറഞ്ഞ വായനാനുഭവമാക്കുമ്പോഴും സിദ്ദീഖ്​​​ സ്വന്തം പ്രാരാബ്​ധങ്ങൾ അടുത്ത സുഹൃത്തുക്കിൽനിന്നുപോലും മറച്ചുവെച്ചു. 'സിദ്ദീഖ്​​'​ എന്നാൽ, കൂട്ടുകാർക്ക്​ കറകളഞ്ഞ സൗഹൃദമായിരുന്നു. അതിനടിയിൽ ഒളിപ്പിച്ചുവെച്ച വേദനക​ളത്രയും അദ്ദേഹത്തെ അടുത്തറിയുന്നവർക്ക്​ ഇപ്പോൾ കണ്ണുനിറയുന്ന ഓർമകളാണ്​. വണ്ടിപ്പെരിയാര്‍ തങ്കമലയിൽ തോട്ടം തൊഴിലാളിയായിരുന്ന ഉരുണിയില്‍ പരേതനായ ഹംസയുടെയും ഖദീജയുടെയും മകനാണ് സിദ്ദീഖ്​. 14ാം വയസ്സിൽ പിതാവ് ​മരിച്ചു. ആര്‍.ബി.ടി തോട്ടം തൊഴിലാളിയായിരുന്ന മാതാവ് ഖദീജയാണ്​ പിന്നെ സിദ്ദീഖിനെയും സഹോദരങ്ങളായ അജു, ഹക്കീം, ഫൈസല്‍ എന്നിവരെയും വളർത്തിയത്​. വണ്ടിപ്പെരിയാര്‍ പഞ്ചായത്ത് ഹൈസ്കൂളിലായിരുന്നു വിദ്യാഭ്യാസം. പിന്നീട്​ യൂത്ത് കോൺഗ്രസ്​ പ്രവർത്തകനും ജില്ല ഭാരവാഹിയുമായി. ഡി.ഐ.സിയിലും അംഗമായിരുന്നു. ഇബ്രാഹിംകുട്ടി കല്ലാര്‍ ഉടുമ്പൻചോലയില്‍ മത്സരിച്ചപ്പോള്‍ മീഡിയയുടെ ചുമതല വഹിച്ചു​. 2006ൽ 'മംഗള'ത്തിന്‍റെ വണ്ടിപ്പെരിയാർ ലേഖകനായാണ്​ പത്രപ്രവർത്തനം തുടങ്ങിയത്​. മുല്ലപ്പെരിയാർ തീരദേശവാസിയായ സിദ്ദീഖ്​​,​​ തീരദേശവാസികളുടെ ആശങ്കകൾക്ക്​ വാർത്തകളിൽ ഇടം നൽകി. അവിടെനിന്ന്​ 'തേജസി'ലും 'സുപ്രഭാത'ത്തിലും എത്തി. തനിക്ക്​ ഏറ്റവും ഇഷ്ടപ്പെട്ട കായികമേഖലയിലെ വാർത്തകൾ റിപ്പോർട്ട് ചെയ്യാനുള്ള ഓരോ അവസരവും സന്തോഷത്തോടെ​ ഏറ്റെടുത്തു​. ഏഷ്യന്‍ അത്‌ലറ്റിക് ചാമ്പ്യന്‍ഷിപ്, ദക്ഷിണേഷ്യന്‍ ഗെയിംസ്, അണ്ടര്‍ 17 ലോകകപ്പ്, സന്തോഷ് ട്രോഫി എന്നിങ്ങനെ നിരവധി ദേശീയ, അന്തര്‍ദേശീയ കായിക മത്സരങ്ങള്‍ റിപ്പോര്‍ട്ട് ചെയ്തു. സ്വന്തമായി ഒരു വീടായിരുന്നു സിദ്ദീഖിന്‍റെ ഏറ്റവും വലിയ സ്വപ്​നം. ഇതിനായി, പട്ടയമില്ലാത്ത പത്ത്​ സെന്‍റ്​ ഭൂമിയിൽ തറമാത്രം കെട്ടിയുയർത്തി ലൈഫ്​ പദ്ധതിയിൽ അപേക്ഷ നൽകി കാത്തിരിക്കുകയായിരുന്നു. പ​ത്രപ്രവർത്തകന്‍റെ പരിവേഷങ്ങളൊന്നുമില്ലാതെ സാധാരണക്കാരിൽ സാധാരണക്കാരനായി വാടകവീട്ടിലെ പരിമിതികൾക്ക്​ നടുവിലൂടെയാണ്​ ആ ജീവിതം മുന്നോട്ടുനീങ്ങിയത്​.