നീന്തലിൽ മിന്നുംതാരങ്ങളായി ഫവാസും ഫിദയും

-വെള്ളത്തിനു മുകളിൽ നിശ്ചലമായി കിടക്കാനും പരിശീലനം നേടി കാഞ്ഞിരപ്പള്ളി: നീന്തൽ പഠിക്കാൻ ആഗ്രഹിച്ച രണ്ട്​ കുട്ടികൾ ചുരുങ്ങിയ കാലത്തിനുള്ളിൽ കാഞ്ഞിരപ്പള്ളിക്കാരുടെ നീന്തൽതാരങ്ങളായി മാറി. കാഞ്ഞിരപ്പള്ളി ആനക്കല്ല് ഇല്ലിച്ചുവട് ഭാഗത്ത് പുതുപ്പറമ്പിൽ അജി സലീം-സുർജി ദമ്പതികളുടെ മക്കളായ ഫവാസ് അജിയും (13), ഫിദ ഫാത്തിമയുമാണ്​ (11) നീന്തലിൽ വിസ്മയം തീർക്കുന്നത്​. വീടിനു പിന്നാമ്പുറത്തെ ചിറ്റാർ പുഴയിൽ കമഴ്ന്നുകിടന്ന്​ നീന്തിയായിരുന്നു ആദ്യ പരിശീലനം. വൈകാതെ മലർന്നുകിടന്ന്​ നീന്താൻ തുടങ്ങി. പിന്നെ, എത്രനേരം വേണമെങ്കിലും വെള്ളത്തിനു മുകളിൽ നിശ്ചലമായി മലർന്നുകിടക്കാമെന്നായി. ഈ കാഴ്ച കേട്ടറിഞ്ഞവർ പുതുപ്പറമ്പിൽ വീട്ടിലേക്ക് എത്തുകയാണ് ഈ അഭ്യാസം നേരിൽ കാണാൻ. പുഴയോരത്ത് വീട്​ നിർമിക്കുകയെന്നത് ഇവരുടെ പിതാവ് അജിയുടെ വലിയ സ്വപ്നമായിരുന്നു. ഈ ആഗ്രഹം സഫലമായതോടെ വീടിന്​ പിന്നിലെ ചിറ്റാർ പുഴയിൽ മക്കളെ കൊണ്ടുപോയി നീന്തൽ പഠിപ്പിക്കാൻ തുടങ്ങിയത്​. നീണ്ട പരിശീലനത്തിനൊടുവിലാണ്​ ശ്വാസക്രമീകരണം നടത്തി വെള്ളത്തിനു മീതെ മലർന്നുകിടന്ന് പിറകോട്ട് നീന്താൻ കഴിയുന്നത്. ഈരാറ്റുപേട്ട ഗൈഡൻസ് സ്കൂളിലെ എട്ടാം ക്ലാസ്​ വിദ്യാർഥിയായ ഫവാസാണ് ആദ്യം പരിശീലനം നേടിയത്. തുടർന്ന് കാഞ്ഞിരപ്പള്ളി സെന്‍റ്​ മേരീസ് ഗേൾസ് ഹൈസ്കൂളിലെ ആറാം ക്ലാസ്​ വിദ്യാർഥിനി സഹോദരി ഫിദയെയും പരിശീലിപ്പിച്ചു. തങ്ങളുടെ കഴിവുകൾ കൂടുതൽ ശ്രദ്ധിക്കുന്ന തലത്തിൽ അവതരിപ്പിക്കാനും ഇവർക്ക്​ ആഗ്രഹമുണ്ട്​. KTG WBL Bhavas and fida spl story ഫവാസും ഫിദയും വെള്ളത്തിനുമീതെ മലർന്നുകിടക്കുന്നു