പ്രണയം നിരസിച്ച വിദ്യാർഥിനിയെ വെട്ടി; സഹപാഠി ആത്​മഹത്യക്ക്​ ശ്രമിച്ചു

മൂന്നാർ: പ്രണയം നിരസിച്ചതിനെ തുടർന്ന് പ്ലസ് ടു വിദ്യാർഥി സഹപാഠിയെ വെട്ടിയശേഷം ആത്മഹത്യക്ക്​ ശ്രമിച്ചു. മൂന്നാർ ടൗൺ സ്വദേശിയായ വിദ്യാർഥി സഹപാഠിയായ പ്ലസ് വൺ വിദ്യാർഥിനിയെയാണ് വെട്ടിയത്. ആത്മഹത്യക്ക്​ ശ്രമിച്ച്​ ഗുരുതരാവസ്ഥയിലായ വിദ്യാർഥിയെ കോലഞ്ചേരി മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു. കഴുത്തിലും കൈക്കും പരിക്കേറ്റ പെൺകുട്ടിയെ കോയമ്പത്തൂർ ആശുപത്രിയിലേക്ക് മാറ്റി. വ്യാഴാഴ്ച വൈകീട്ട് നാലരയോടെയാണ് സംഭവം. ക്ലാസ് കഴിഞ്ഞ് സ്കൂൾ ബസിൽ വീടിന്​ സമീപത്ത് ഇറങ്ങിയ പെൺകുട്ടിയെ പിന്തുടർന്ന് എത്തിയ വിദ്യാർഥി അടുത്തുള്ള ദേവാലയ പരിസരത്തേക്ക് വിളിച്ചു കൊണ്ടുപോയി. പിൻഭാഗത്തുള്ള ശുചിമുറിയുടെ സമീപം ഇവർ സംസാരിച്ചു നിൽക്കുന്നതിനിടെ പ്രകോപിതനായ വിദ്യാർഥി കൈയിൽ കരുതിയിരുന്ന കത്തിയെടുത്ത് പെൺകുട്ടിയെ വെട്ടുകയായിരുന്നു. വീടിന്​ സമീപം കാത്തുനിന്ന അമ്മ, ശരീരം മുഴുവൻ രക്തമൊലിച്ച്​ ഓടി വരുന്ന മകളെയാണ് കണ്ടത്. അലറി വിളിച്ച അമ്മ അയൽക്കാരെയും കൂട്ടി പെൺകുട്ടിയെ മൂന്നാറിലുള്ള സ്വകാര്യ ആശുപത്രിയിൽ എത്തിച്ചു. പെൺകുട്ടി ഓടിപ്പോകുന്നത്​ കണ്ട വിദ്യാർഥി ആക്രമിക്കാൻ ഉപയോഗിച്ച കത്തികൊണ്ട് സ്വയം കഴുത്ത്​ മുറിക്കുകയായിരുന്നു. കൈത്തണ്ടയിലും സ്വയം പരിക്കേൽപ്പിച്ചു. ദേഹമാസകലം രക്തം പടർന്നതോടെ അടുത്തുള്ള ഒരു തോടിനു സമീപം വീണു. വിദ്യാർഥിയുടെ സമീപത്തേക്ക് അടുക്കാൻ നാട്ടുകാർ ആദ്യം ഭയന്നെങ്കിലും പിന്നീട് ആശുപത്രിയിൽ എത്തിച്ചു. മൂന്നാർ ഡിവൈ.എസ്.പി കെ.ആർ. മനോജിന്‍റെ നേതൃത്വത്തിലുള്ള സംഘം അന്വേഷണം ആരംഭിച്ചു.