പ്രായപൂർത്തിയാകാത്ത പെൺകുട്ടികളോട് ലൈംഗികാതിക്രമം; വ്യാപാരി അറസ്റ്റിൽ

കൊല്ലം: പ്രായപൂർത്തിയാകാത്ത പെൺകുട്ടികളോട് ലൈംഗികാതിക്രമം നടത്തിയ കേസിൽ വ്യാപാരിയെ പോക്സോ ആക്ട് പ്രകാരം പള്ളിത്തോട്ടം പൊലീസ് അറസ്റ്റ് ചെയ്തു. കൊല്ലം ജോനകപ്പുറം ഷംനാ മൻസിലിൽ നിന്നും വടക്കേവിള ഗോപാലശ്ശേരി ജി.വി നഗർ 10ൽ ഇടത്തോടത്ത് കിഴക്കതിൽ ഫൈസൽ (34) ആണ് പള്ളിത്തോട്ടം പൊലീസി‍െൻറ പിടിയിലായത്.

ഇയാളുടെ കടയിൽ സാധനം വാങ്ങാൻ വന്ന പെൺകുട്ടികളോടാണ് ലൈംഗികാതിക്രമം നടത്തിയത്. കൊല്ലം എ.സി.പി ജി.ഡി വിജയകുമാറി‍െൻറ നിർദേശാനുസരണം പള്ളിത്തോട്ടം ഇൻസ്പെക്ടർ ഫയാസി‍െൻറ നേതൃത്വത്തിൽ എസ്.ഐമാരായ സൂഖേഷ്, അനിൽബേസിൽ, മാത്യു, എ.എസ്.ഐ ശ്രീകുമാർ, എസ്.സി.പി.ഒ ഷീജ എന്നിവരടങ്ങിയ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.