ഉറങ്ങാൻ കിടന്ന തൊഴിലാളി അടുത്ത കെട്ടിടത്തിന്റെ മുകളിൽ വീണ് പരിക്ക്
text_fields
ഫയർഫോഴ്സ് ഉദ്യോഗസ്ഥർ രക്ഷാപ്രവർത്തനം നടത്തുന്നു
ശാസ്താംകോട്ട: ശാസ്താംകോട്ടയിൽ ജോലിക്കെത്തിയ നെടുമങ്ങാട് സ്വദേശി ഉറക്കത്തിൽ തൊട്ടടുത്ത കെട്ടിടത്തിന്റെ മുകളിലേക്ക് വീണ് ഗുരുതരപരിക്കേറ്റു. മറ്റ് തൊഴിലാളികളോടൊപ്പം ചൂട് കാരണം മൂന്നാമത്തെ നിലയുടെ മുകളിലായിരുന്നു ഉറങ്ങാൻ കിടന്നിരുന്നത്. ഇവർ കിടന്ന കെട്ടിടത്തിന്റെ മുകളിൽ സൈഡ് ഭിത്തി കെട്ടാത്തതിനാൽ നിരപ്പായി കിടക്കുന്ന സ്ഥിതിയിലായിരുന്നു.
ഞായറാഴ്ച രാവിലെ കൂടെയുള്ളവർ എഴുന്നേറ്റപ്പോഴാണ് തംബുരു എന്ന തൊഴിലാളിയെ കാണാതായത് ശ്രദ്ധയിൽ പെട്ടത്. അന്വേഷിച്ചപ്പോഴാണ് ഇവർ കിടന്നുറങ്ങിയിരുന്ന കെട്ടിടത്തിന്റെ തൊട്ടടുത്തുള്ള സ്വകാര്യ ആശുപത്രി ഒന്നാമത്തെ നിലയിൽ വീണു കിടക്കുന്നത് ശ്രദ്ധയിൽപെട്ടത്.
ശാസ്താംകോട്ടയിൽനിന്ന് ഫയർഫോഴ്സ് ഉദ്യോഗസ്ഥരെത്തി അപകടത്തിൽപെട്ടയാളെ താഴെ എത്തിച്ച് അവരുടെ വാഹനത്തിൽ തന്നെ ശാസ്താംകോട്ട താലൂക്കാശുപത്രിയിൽ എത്തിച്ചു. പരിക്ക് ഗുരുതരമായതിനാൽ അവിടെനിന്ന് മെഡിക്കൽ കോളജിലേക്ക് മാറ്റി.