വിജയ​െൻറ മരണത്തിൽ അന്വേഷണം എങ്ങുമെത്തിയില്ല

കുന്നിക്കോട്: ഇളമ്പലിലെ ടാക്സി ഡ്രൈവറായ വിജയ​െൻറ മരണവുമായി ബന്ധപ്പെട്ട അന്വേഷണം എങ്ങുമെത്തിയില്ല. മരണകാരണം കണ്ടെത്താനായി നിയോഗിക്കപ്പെട്ട ക്രൈംബ്രാഞ്ചും ഇരുട്ടില്‍ തന്നെ.

2014 ഡിസംബർ 14 നാണ്​ ഇളമ്പല്‍ കുര്യാണി വീട്ടിൽ ദുരി വിജയന്‍ എന്ന വിജയന്‍പിള്ളയെ തെങ്ങിന്‍പുരയിടത്തില്‍ മരിച്ചനിലയില്‍ കണ്ടെത്തിയത്. വലതു കൈയിലെ വിരലറ്റ നിലയിലുള്ള മുറിവും മൃതദേഹത്തി​െൻറ കിടപ്പും ദുരൂഹത ഉയർത്തുന്നതായിരുന്നു. തിരുവനന്തപുരം മെഡിക്കൽ കോളജ്​ ആശുപത്രിയിൽ നടത്തിയ പോസ്​റ്റ്​മോർട്ടം റിപ്പോർട്ടില്‍ ശരീരത്ത് ക്ഷതം ഏറ്റതായി സൂചനയുണ്ട്. കുന്നിക്കോട് പൊലീസ് അന്വേഷണം ആരംഭിച്ച കേസ് 2016 ല്‍ ബന്ധുക്കളുടെയും നാട്ടുകാരുടെയും ആവശ്യത്തെ തുടര്‍ന്ന് ക്രൈംബ്രാഞ്ചിന് കൈമാറി.

ഗ്രാമപഞ്ചായത്ത് അംഗത്തെ കാണാനാണെന്ന് പറഞ്ഞാണ് വിജയന്‍ വീട്ടില്‍ നിന്ന്​ പോയതെന്ന് ബന്ധുക്കള്‍ പറയുന്നുണ്ട്. സുഹൃത്തുക്കൾക്ക് ഒപ്പം വിജയൻ ഉച്ചക്ക്​ 12 വരെ ഉണ്ടായിരുന്നു. തുടര്‍ന്നാണ് ഇയാൾ വാര്‍ഡ് അംഗത്തെ കാണാൻ പോയതെന്നും മൊഴികള്‍ ഉണ്ട്. തെങ്ങിൽനിന്ന് വീഴുന്നത് കണ്ടെന്നാണ് പ്രദേശവാസികളായ മൂന്നുപേര്‍ പൊലീസില്‍ മൊഴി നൽകിയത്. ഇതിനിടെ കേസ് കൈകാര്യം ചെയ്ത ഉദ്യോഗസ്ഥൻ സര്‍വിസില്‍ നിന്ന്​ വിരമിച്ചതും തുടരന്വേഷണം മന്ദഗതിയിലായി. ഭാര്യയും മക്കളുമടങ്ങുന്ന കുടുംബവുമായി അകന്ന് കഴിഞ്ഞ വിജയൻ പിള്ളയുടെ മരണത്തി​െൻറ അന്വേഷണം എങ്ങുമെത്താതെ നില്‍ക്കുകയാണ്. പൗരസമതിയുടെ നേതൃത്വത്തില്‍ ഉന്നത ഉദ്യോഗസ്ഥര്‍ക്ക് പരാതി നല്‍കാന്‍ തയാറെടുക്കുകയാണ് നാട്ടുകാര്‍.