ആര്യങ്കാവിലെ ചന്ദന കൊള്ള: ശിൽപി പിടിയിൽ

പുനലൂർ: ആര്യങ്കാവ് വനാതിർത്തിയിൽ അടുത്തിടെ നടന്ന ചന്ദന മോഷണവുമായി ബന്ധപ്പെട്ട് ശിൽപിയെ വനപാലകർ അറസ്റ്റ് ചെയ്തു. തിരുവനന്തപുരം മണക്കാട്​ മുട്ടത്തറ ബേബി ഭവനിൽ നകുലൻ (52) ആണ് പിടിയിലായത്. ഇയാളുടെ വീട്ടിൽനിന്ന്​ 20 കിലോ വരുന്ന 14 മുട്ടി ചന്ദനം കണ്ടെടുത്തു. ചന്ദനമരങ്ങൾ മുറിച്ചുകടത്തി നകുലന് എത്തിച്ചുകൊടുത്ത തമിഴ്നാട് സ്വദേശികൾ ഉടൻ പിടിയിലാകുമെന്ന് വനപാലകർ പറഞ്ഞു.

ഈ വർഷം ജൂൺ, ജൂലൈ മാസങ്ങളിലായി ആര്യങ്കാവ് റേഞ്ചിൽനിന്ന്​ രണ്ട്​ ചന്ദനമരമാണ് മോഷണം പോയത്. ഇതിനുപിന്നിൽ തമിഴ്നാട് സ്വദേശികളാണ്. മോഷ്ടിച്ച ചന്ദനം ഇവർ നകുലന് എത്തിച്ചുകൊടുത്തു.

വിവരമറിഞ്ഞ് വനപാലകർ കഴിഞ്ഞ രാത്രി വീട് വളഞ്ഞ് നകുലനെ കസ്റ്റഡിയിലെടുക്കുകയായിരുന്നു. ചന്ദനത്തിൽ ശിൽപങ്ങൾ ഉണ്ടാക്കി വിൽക്കുന്ന ഇയാൾക്കെതിരെ പരുത്തിപ്പാറ റേഞ്ചിൽ രണ്ട്​ ചന്ദന കേസുണ്ട്. പലതവണ ഇയാളുടെ വീട്ടിൽ നിന്നും അധികൃതർ ചന്ദനം പിടിച്ചെടുത്തിട്ടുണ്ട്. കോടതിയിൽ ഹാജരാക്കി റിമാൻഡ് ചെയ്തു.