ചരക്കുലോറി ഇടിച്ചുകയറി ഡ്രൈവർക്ക് പരിക്കേറ്റു

പുനലൂർ: പാതയോരത്തേക്ക് ചരക്കുലോറി ഇടിച്ചുകയറി ഡ്രൈവർക്ക് ഗുരുതരമായി പരിക്കേറ്റു. തമിഴ്നാട് ആലംകുളം സ്വദേശി പനീർശെൽവമിനാണ്​ (52) പരിക്ക്. പുനലൂർ താലൂക്കാശുപത്രിയിൽ പ്രവേശിപ്പിച്ചു. ദേശീയപാത 208ൽ ഉറുകുന്ന് ബഥേൽ ജങ്ഷന് സമീപം ചൊവ്വാഴ്ച പുലർച്ചയായിരുന്നു അപകടം.

ഇറക്കവും കൊടുംവളവുമായ ഈ ഭാഗത്ത് പാതയിലെ വഴുവഴുപ്പ് കാരണം ലോറി നിയന്ത്രണം വിട്ട് വശത്തേക്ക് ഇടിച്ചുകയറുകയായിരുന്നു.

ഒരു കിലോമീറ്ററോളം വരുന്ന ഇറക്കത്ത് ഡീസൽ ലാഭിക്കാൻ വാഹനങ്ങൾ ന്യൂട്രൽ ഗിയറിൽ വരുന്നതാണ് മിക്കപ്പോഴും അപകടങ്ങൾക്കിടയാക്കുന്നത്.

കൂടാതെ ടാറിങ്ങിലെ അപാകതമൂലം മഴയായാൽ ഈ ഭാഗത്ത് തെന്നൽ അനുഭവപ്പെടുന്നതും അപകടത്തിനിടയാക്കുന്നു.