ഗണേശിനെ പിന്തുണച്ചു; കൊടിക്കുന്നിലിനെതിരെ യൂത്ത് കോണ്‍ഗ്രസില്‍ പ്രതിഷേധം

പത്തനാപുരം: കെ.ബി. ഗണേശ്കുമാർ എം.എൽ.എയെ പുകഴ്ത്തിയതിന്‍റെ പേരിൽ കൊടിക്കുന്നില്‍ സുരേഷ് എം.പിക്കെതിരെ യൂത്ത് കോണ്‍ഗ്രസ് നേതാവിന്‍റെ ഫേസ്ബുക്ക് പോസ്റ്റ്. യൂത്ത് കോണ്‍ഗ്രസ് നിയോജകമണ്ഡലം പ്രസിഡന്‍റ് എസ്. ഷക്കിമാണ് കഴിഞ്ഞ ദിവസം സമൂഹമാധ്യമങ്ങള്‍ വഴി എം.പിക്കെതിരെ വിമര്‍ശനം ഉന്നയിച്ചത്.

മറ്റ് നേതാക്കളും ഇതിനെ പിന്തുണക്കുന്നുണ്ട്. ത ലവൂര്‍ നടുത്തേരിയിലെ താലൂക്ക് ആയുര്‍വേദ ആശുപത്രിയുടെ ഉദ്ഘാടന പൊതുസമ്മേളനത്തിന്‍റെ വേദിയില്‍ കൊടിക്കുന്നില്‍ സുരേഷ് എം.എല്‍.എയെ പ്രശംസിച്ച് സംസാരിച്ചിരുന്നു. ഇതിന് പിന്നാലെയാണ് ഫേസ്ബുക്ക് പോസ്റ്റ് പ്രത്യക്ഷപ്പെട്ടത്‌.

കോണ്‍ഗ്രസിന്റെ ദേശീയ - സംസ്ഥാന നേതാക്കളെയെല്ലാം രൂക്ഷമായി വിമര്‍ശിക്കുന്ന ഗണേഷ്കുമാറിനെ പൊതുവേദിയില്‍ പ്രശംസിച്ച കൊടിക്കുന്നിലിന് മറ്റെന്തെങ്കിലും രാഷ്ട്രീയനിലപാട് ഉണ്ടെങ്കില്‍ അത് വെളിപ്പെടുത്തണമെന്നും യൂത്ത് കോണ്‍ഗ്രസ് ആവശ്യപ്പെടുന്നു. ഫേസ്ബുക്ക് പോസ്റ്റിനെ പിന്തുണച്ച് യൂത്ത് കോണ്‍ഗ്രസിന്‍റെയും കോണ്‍ഗ്രസിന്‍റെയും നേതാക്കളും രംഗത്തെത്തിയിട്ടുണ്ട്.