മൂട്ടിപഴത്തി​െൻറ രുചി തേടി ആളുകള്‍ കാടുകയറുന്നു

പത്തനാപുരം: മൂട്ടിമരങ്ങള്‍ കായ്​ച്​ തുടങ്ങിയതോടെ ചവർപ്പുള്ള പഴത്തി​െൻറ രുചി തേടി നിരവധി പേര്‍ കാടുകയറുന്നു. പശ്ചിമഘട്ടമലനിരകളെ സമ്പുഷ്​ടമാക്കുന്ന മൂട്ടിപഴം ഇതുവരെ വിപണിയിലേക്ക് എത്തിയിട്ടില്ല.

കേരളത്തിലെ വനമേഖലയിൽ അപൂർവമായി കാണപ്പെടുന്ന പഴവർഗമാണ് മൂട്ടിപ്പഴം. മൂട്ടിപ്പുളി, മൂട്ടിക്കായ്​പൻ, കുന്തപ്പഴം എന്നീ പേരുകളിലാണ് പ്രാദേശികമായി അറിയപ്പെടുന്നത്. വേനൽക്കാലത്ത് പൂവിടുന്ന മൂട്ടിമരം കാലവർഷത്തോടെയാണ് കായ്ക്കുന്നത്. മരത്തി​െൻറ തായ്​ത്തടിയിൽ മാത്രമാണ് കായ്​കൾ ഉണ്ടാകുക. ജൂൺ, ജൂലൈ മാസങ്ങളിലാണ് ഫലം പാകമാകുന്നത്. പശ്ചിമഘട്ടത്തിലെ തനത് സ്​പീഷ്യസിൽപെട്ട ഫലവൃക്ഷമാണ് മൂട്ടിമരം.

ഒരു കാലത്ത് ആദിവാസികൾ മാത്രം ഉപയോഗിച്ചിരുന്ന ഫലം സാധാരണക്കാർക്ക് ലഭിച്ചു തുടങ്ങിയിട്ട് ഏറെക്കാലം ആയിട്ടില്ല. കട്ടിയുള്ള പുറം തൊലിയും അകത്ത് വിത്തും ഉണ്ടാകും. വിത്തിനു ചുറ്റുമുള്ള മാംസളമായ ഭാഗമാണ് പ്രധാനമായും ഭക്ഷിക്കുന്നത്. ഇതി​െൻറ തോടും അച്ചാറ് ഇടുന്നതിന് ഉപയോഗിക്കുന്നുണ്ട്. പഴം അധികവും മരത്തി​െൻറ ചുവട്ടിലാണ് ഉണ്ടാകുന്നത്. ഇതിലാണത്രെ മൂട്ടിപ്പഴം എന്ന പേര് ലഭിച്ചത്. മലയണ്ണാൻ, കരടി, ആന, കുരങ്ങ് എന്നിവയുടെ ഇഷ്​ടവിഭവമാണ് മൂട്ടിപ്പഴം. വിപണിയിൽ 100 മുതൽ 150 വരെയാണ് വില. ജലാംശം കൂടുതൽ ഉള്ളതിനാൽ വിറ്റാമിൻ, പ്രോട്ടീൻ എന്നിവ ഫലങ്ങളിൽ കൂടുതൽ ഉണ്ട്. ദക്ഷിണേന്ത്യയിലെ നിത്യഹരിതവനങ്ങളിൽ മാത്രമാണ് മൂട്ടിമരം ഉണ്ടാകാറുള്ളത്. കാനനമധ്യത്തിലെ കാട്ടുപഴത്തി​െൻറ രുചി തേടി മറ്റ് ജില്ലകളിൽനിന്നു വരെ ആളുകൾ കിഴക്കൻ മേഖലയിലേക്ക് എത്തുന്നുണ്ട്.