ബ്യൂട്ടീഷ്യന്‍റെ കൊലപാതകം: വിധി 11ന്​

കൊല്ലം: ബ്യൂട്ടീഷ്യനായ യുവതിയെ കൊല്ലത്തുനിന്ന്​ പാലക്കാട്ട്​ എത്തിച്ച്​ കൊലപ്പെടുത്തി, മൃതദേഹം വെട്ടിമുറിച്ച്​ കുഴിച്ചിട്ട കേസിൽ കൊല്ലം ഒന്നാം അഡീഷനൽ സെഷൻസ്​ ജഡ്ജി മെയ്​ 11ന്​ വിധി പറയും. പ്രതി കോഴിക്കോട്​ സ്വദേശിയായ പ്രശാന്ത്​ നമ്പ്യാരുടെ ഭാര്യയുടെ സു​ഹൃത്തായിരുന്നു കൊല്ലപ്പെട്ട യുവതി. ഇവരുമായി ​രഹസ്യമായി ​ഫോണിലൂടെ ബന്ധം സ്ഥാപിച്ച പ്രതി രണ്ടര ലക്ഷം രൂപ തട്ടിയെടുത്തിരുന്നു.

വിവാഹമോചിതയായ യുവതി പ്രതിയിൽ നിന്ന്​ കൃത്രിമ ബീജ സങ്കലനത്തിലൂടെ കുഞ്ഞിനെ വേണമെന്ന്​ ആവശ്യപ്പെട്ടിരുന്നു. തന്‍റെ കുടുംബജീവിതത്തെ ഇത്​ ബാധിക്കുമെന്ന്​ കരുതിയ പ്രതി യുവതിയെ തന്ത്രപൂർവം പാലക്കാട്​ മണലിയിലുള്ള വാടകവീട്ടിൽ എത്തിച്ചാണ്​ കൊലപ്പെടുത്തിയത്​.

2020 മാർച്ച്​ 17ന്​ കോലഞ്ചേരിയിൽ പരിശീലനത്തിന്​ പോകുന്നുവെന്ന്​ പറഞ്ഞ്​ കൊല്ലത്തെ വീട്ടിൽനിന്ന്​ പോയ യുവതി മാർച്ച്​ 20നാണ്​ വീട്ടുകാരുമായി അവസാനം സംസാരിച്ചത്​. 22ന്​ തിരികെ എത്തുമെന്ന്​ പറഞ്ഞിരുന്ന യുവതി എത്താതിരുന്നതിനെതുടർന്ന്​ വീട്ടുകാരുടെ പരാതിയിൽ കൊട്ടിയം പൊലീസ്​ കേസെടുത്ത്​ അന്വേഷണം നടത്തുകയായിരുന്നു.

ഫോൺ വിവരങ്ങളുടെ അടിസ്ഥാനത്തിൽ പ്രതിയെ പൊലീസ്​ ബന്ധപ്പെട്ടെങ്കിലും ഇയാൾ അന്വേഷണം വഴിതെറ്റിക്കുന്ന രീതിയിലാണ്​ മറുപടി നൽകിയത്​. കോവിഡ്​ തുടക്കത്തിൽ ആയിരുന്നതിനാൽ അന്വേഷണത്തിന്​ പരിമിതി ഉണ്ടായിരുന്നു.

തുടർന്ന്​ സിറ്റി ക്രൈംബ്രാഞ്ച്​ അസിസ്റ്റന്‍റ്​ പൊലീസ്​ കമീഷണർ ബി. ഗോപകുമാറിന്‍റെ നേതൃത്വത്തിൽ പ്രത്യേകഅന്വേഷണ സംഘമാണ്​ തിരോധാനത്തിൽ പ്രശാന്ത്​ നമ്പ്യാരുടെ പങ്ക്​ ​വെളി​ച്ചത്തുവന്നത്​. ഇയാളെ കസ്റ്റഡിയിലെടുത്ത്​ ചോദ്യം ചെയ്യലിൽ ലഭിച്ച വിവരത്തിന്‍റെ അടിസ്ഥാനത്തിലാണ്​​ പാലക്കാടുനിന്ന്​ മൃതദേഹം കണ്ടെത്തിയത്​.

പ്രതി ​ഫോണിൽ നിന്ന്​ ഡീലീറ്റ്​ ചെയ്ത ചാറ്റുകൾ ഉൾപ്പെടെ വീണ്ടെടുത്താണ്​ ​ തെളിവുകൾ ഹാജരാക്കിയത്​. എ.സി​.പി ഗോപകുമാറിന്‍റെ നേതൃത്വത്തിൽ എസ്​.ഐമാരായ വി.അനിൽകുമാർ, സി.അമൽ, സൈബർ പൊലീസ്​ ഉദ്യോഗസ്ഥരായ എ.നിയാസ്​, പ്രതാപ്​, എന്നിവരാണ്​ ചാറ്റുകൾ വീണ്ടെടുത്തത്​.

സൈബർ ഫോറൻസിക്​ ഉദ്യോഗസ്ഥയായ എ.എസ്​. ദീപ പ്രതിയുടെ ​ഫോണിൽ നിന്ന്​ കണ്ടെത്തിയ രേഖകളും കോടതിയിൽ ഹാജരാക്കിയിട്ടുണ്ട്​. പ്രോസിക്യൂഷന്​ വേണ്ടി സ്​പെഷൽ പബ്ലിക്​ പ്രോസിക്യൂട്ടർ അഡ്വ. ജി. മോഹൻരാജാണ്​ ഹാജരായത്​. പ്രതികൾക്കായി കോഴിക്കോട്​ ബാറിലെ അഡ്വ. എം. മഹേഷ്​, അഡ്വ. വി.കെ. വിപിനചന്ദ്രൻ, അഡ്വ. ബിനോയ്​ദാസ്​ എന്നിവർ ഹാജരായി.