ഒാണം 'പൊടിപൊടിക്കാൻ' പപ്പട രുചിയുമായി വാസുവും കുടുംബവും

കുളത്തൂപ്പുഴ: 36 വര്‍ഷമായി കുളത്തൂപ്പുഴക്കാരുടെ തീന്‍മേശകളില്‍ പപ്പടത്തി​െൻറ രുചിക്കൂട്ടുതീര്‍ത്ത വാസുവും കുടുംബവും കോവിഡ് ആശങ്കകളെ തുടര്‍ന്ന് അൽപം വൈകിയെങ്കിലും ഓണസദ്യക്കുള്ള പപ്പടം ഒരുക്കി വിപണിയിലെത്തിച്ചു.

വര്‍ഷങ്ങള്‍ക്കുമുമ്പ് കുന്നംകുളത്തുനിന്ന് ഭാര്യയും മകനുമൊപ്പം കുളത്തൂപ്പുഴയിലെത്തിയ വാസു മുസ്​ലിം പള്ളിക്ക് സമീപം വാടകക്കെടുത്ത കെട്ടിടത്തില്‍ പപ്പട നിർമാണം ആരംഭിക്കുകയായിരുന്നു. തുടക്കത്തില്‍ ഉഴുന്നുമാവും കൂട്ടുകളും ഇടിച്ചുചേര്‍ത്ത്​ മയം വരുത്തി ചെയ്​തിരുന്ന പപ്പട നിർമാണം ഇപ്പോള്‍ യന്ത്രങ്ങളുടെ സഹായത്തോടെ ആയതോടെ ശാരീരിക അധ്വാനത്തിന്​ കുറവുവന്നിട്ടുണ്ട്.

മൂന്നരപ്പതിറ്റാണ്ടായി കുളത്തൂപ്പുഴക്കാരുടെ ആഘോഷവേളകളിലെല്ലാം തന്നെ വാസുവിെൻറയും കുടുംബത്തിെൻറയും പപ്പടം നിറസാന്നിധ്യമാണ്. ഇക്കുറി കോവിഡ് കാലം വല്ലാതെ വലച്ചു. കുളത്തൂപ്പുഴക്കാരുടെ ഏറെ വിശേഷപ്പെട്ട വിഷുവും പെരുന്നാളുകളും, മറ്റ് പ്രാദേശിക ആഘോഷദിനങ്ങളുമെല്ലാം കോവിഡി​െൻറ പിടിയിലായതോടെ കടകള്‍ അടച്ചിട്ടതും വ്യാപാരം കുറഞ്ഞതുമെല്ലാം പപ്പട നിർമാണത്തെയും പ്രതികൂലമായി ബാധിച്ചു.

മാസങ്ങളായി നിത്യ​െചലവിനുപോലുമുള്ള കച്ചവടമുണ്ടായിരുന്നില്ല. കഴിഞ്ഞദിവസം മുതല്‍ വ്യാപാരശാലകളെല്ലാം തുറന്നുപ്രവര്‍ത്തിക്കുകയും മാര്‍ക്കറ്റിലേക്ക് ഗ്രാമപ്രദേശങ്ങളില്‍നിന്ന് ആളുകളെത്തുകയും ചെയ്തുതുടങ്ങിയതോടെ പപ്പടത്തിന്​ ചെലവ്​ വര്‍ധിച്ചതി​െൻറ ആശ്വാസത്തിലും ആവേശത്തിലുമാണ്​ കുടുംബം.