ഒപ്പം താമസിച്ച സ്ത്രീയെ മർദിച്ച കേസിൽ പ്രതി അറസ്റ്റിൽ

കൊട്ടാരക്കര: ആറ് വർഷമായി ഒപ്പം താമസിക്കുകയായിരുന്ന സ്ത്രീയെ ഭീഷണിപെടുത്തുകയും മർദിക്കുകയും ചെയ്ത കേസിൽ പ്രതി അറസ്റ്റിൽ. തിരുവനന്തപുരം കഴക്കൂട്ടം അണ്ടൂർകോണം ലത ഭവനിൽ ബിജു എൻ. നായർ (45) ആണ് അറസ്റ്റിലായത്. ബാങ്ക് ജീവനക്കാരനായ ബിജു തൃക്കണ്ണമംഗലിൽ വീട് വാടകയ്‌ക്കെടുത്ത് ഗീതയോടൊപ്പം താമസിച്ചു വരുകയായിരുന്നു.

വെള്ളിയാഴ്ച രാത്രിയിലായിരുന്നു സംഭവം. ബിജുവിന്‍റെ മർദനമേറ്റ ഗീത വീട്ടിൽ നിന്നു ഇറങ്ങി ഓടി വാർഡ് കൗൺസിലറുടെ വീട്ടിൽ അഭയം പ്രാപിക്കുകയായിരുന്നു. തുടർന്ന് പൊലീസും കൗൺസിലറും ചേർന്ന് ഗീതയെ ആശുപത്രിയിൽ പ്രവേശിപ്പിച്ചു. ഗീതയുടെ പരാതിയുടെ അടിസ്ഥാനത്തിൽ പൊലീസ് കേസെടുത്ത് ബിജുവിനെ അറസ്റ്റ് ചെയ്യുകയായിരുന്നു. പ്രതിയെ റിമാൻഡ് ചെയ്തു.