പഴകിയ ഭക്ഷണം പിടിച്ചെടുത്തു

കൊട്ടാരക്കര: എം.സി റോഡിന് സമീപത്തെ എട്ട് ഹോട്ടലുകളിൽ നഗരസഭ ഹെൽത്ത് വിഭാഗം പരിശോധന നടത്തി. ആറ് കടകളിൽനിന്ന് പഴകിയ ഭക്ഷണസാധനങ്ങൾ പിടിച്ചെടുത്തു. ചൊവ്വാഴ്ച രാവിലെ 10 ഓടെ കൊട്ടാരക്കര എം.സി റോഡിലെ പ്രമുഖ ഹോട്ടലുകളിൽനിന്നാണ് പഴകിയ ചിക്കൻ, ബീഫ്, മട്ടൺ, നൂഡിൽസ്, ചപ്പാത്തി, അച്ചാർ, വെളിച്ചെണ്ണ എന്നിവ പിടിച്ചെടുത്തത്. പഴകിയ ഭക്ഷണങ്ങൾ ഫ്രിഡ്ജിലും മറ്റും സൂക്ഷിച്ച് വെച്ചിരിക്കുകയായിരുന്നു.

പഴകിയ വെളിച്ചെണ്ണ ഉപയോഗിച്ച് ഭക്ഷണസാധനങ്ങൾ ഉണ്ടാക്കിയതായി കണ്ടെത്തി. ദിവസങ്ങൾ പഴക്കം വന്ന ഇറച്ചി വീണ്ടും ഉപയോഗിക്കാൻ വെച്ചപ്പോഴാണ് അധികൃതർ പിടികൂടിയത്. ഹോട്ടൽ ഉടമകളിൽനിന്ന് മാപ്പപേക്ഷ സ്വീകരിക്കുകയും പിഴ ചുമത്തുകയും ചെയ്യും. ആവർത്തിച്ചാൽ ഹോട്ടലുകളുടെ ലൈസൻസ് റദ്ദാക്കുമെന്ന് അധികൃതർ പറഞ്ഞു. ഹെൽത്ത് ഇൻസ്പെക്ടർ വി.പി. അജിത്തിന്‍റെ നേതൃത്വത്തിൽ എസ്. സുജി, ജൂനിയർ എച്ച്.ഐമാരായ അശ്വതി, ആർ.ആർ. രതീശ് എന്നിവർ പരിശോധനയിൽ പങ്കെടുത്തു.