നഗരമധ്യത്തിൽ പെരുമ്പാമ്പ്; വനപാലകരെത്തിയപ്പോൾ 'മുങ്ങി'

കൊട്ടാരക്കര: പുല​ർച്ച നഗരമധ്യത്തിൽ നടുറോഡിൽ പെരുമ്പാമ്പിനെ കണ്ടെത്തി. കൊട്ടാരക്കര ചന്തമുക്കിലാണ് സംഭവം. കാറിലെത്തിയ യുവാക്കളാണ് റോഡ്​ മുറിച്ച് പെരുമ്പാമ്പിഴയുന്നത് കണ്ടത്. കാർ നിർത്തിയ ഇവർ പാമ്പ്​ ഇഴഞ്ഞുപോകുന്നത് വിഡിയോയിൽ പകർത്തി.

അപ്പോഴേക്കും റോഡുവശത്തുള്ള ടാർ പാളിൻ കൊണ്ട് മറച്ച പഴക്കടയിലേക്ക് ഇഴഞ്ഞുകയറി. കടക്ക്​ മുന്നിൽ എഴുതിവെച്ചിരുന്ന ഉടമയുടെ ​​േഫാൺ നമ്പരിലേക്ക് വിളിച്ച് യുവാക്കൾ വിവരമറിയിച്ചു.

സ്ഥലത്തെത്തിയ ഉടമ പത്തനാപുരം വനം വകുപ്പ് ഓഫിസിൽ വിവരമറിയിച്ചതിനെ തുടർന്ന് ഉദ്യോഗസ്ഥർ സ്ഥലത്തെത്തി പരിശോധന നടത്തി. കടയിലെ മുഴുവൻ സാധനങ്ങളും പുറത്തെടുത്ത് പുലർച്ച അഞ്ചരവരെ മുക്കും മൂലയും അരിച്ചുപെറുക്കിയെങ്കിലും പെരുമ്പാമ്പിനെ കണ്ടെത്താനായില്ല.

ഓടവഴി രക്ഷപ്പെട്ടിരിക്കാമെന്ന്​ സംശയിക്കുന്നു. ഏകദേശം ഒമ്പതടിയോളം വലിപ്പമുള്ളതായിരുന്നു പെരുമ്പാമ്പെന്ന് യുവാക്കൾ പറഞ്ഞു.