ഹോം ക്വാറൻറീൻ ലംഘിച്ചവരെ ഗൃഹവാസ പരിചരണകേന്ദ്രത്തിലേക്ക് മാറ്റി

കൊല്ലം: കോവിഡ് ഗൃഹചികിത്സയിലുള്ളവർ സമ്പർക്ക വിലക്ക് ലംഘിച്ചതിന് സിറ്റി പൊലീസ് കേസെടുത്തു.ഒമ്പത് പേർക്കെതിരെയാണ് കൊല്ലം ഈസ്​റ്റ്​, കിളികൊല്ലൂർ, അഞ്ചാലുംമൂട്, ചവറ, തെക്കുംഭാഗം, കരുനാഗപ്പള്ളി എന്നീ പൊലീസ്​ സ്​റ്റേഷനുകളിൽ പകർച്ചവ്യാധി പ്രതിരോധ നിയമപ്രകാരം കേസ്​ രജിസ്​റ്റർ ചെയ്തത്. തുടർന്ന് ഒമ്പത് പേരെയും ഗൃഹവാസ നിരീക്ഷണ കേന്ദ്രത്തിലേക്ക് മാറ്റി. കോവിഡ് രോഗികൾ ക്വാറൻറീൻ ലംഘിച്ച് പൊതുസമൂഹത്തിൽ കറങ്ങിനടന്നതായി ജില്ല പൊലീസ്​ മേധാവി ടി. നാരായണൻ ലഭിച്ച വിവരങ്ങളുടെ അടിസ്ഥാനത്തിലാണ് നടപടി.

ക്വാറൻറീൻ ലംഘിച്ച് മനഃപൂർവം രോഗവ്യാപനം നടത്തുന്നവർക്കെതിരെ വരും ദിവസങ്ങളിലും കർശന നടപടി സ്വീകരിക്കുമെന്ന് ജില്ല പൊലീസ്​ മേധാവി അറിയിച്ചു. കഴിഞ്ഞ 24 മണിക്കൂറിനുള്ളിൽ 374 വാഹനങ്ങൾ പിടിച്ചെടുക്കുകയും നിയമലംഘനം കണ്ടെത്തിയ 21 കടകൾ അടച്ചുപൂട്ടുകയും 58 വ്യക്തികളെ അറസ്​റ്റ് ​ചെയ്യുകയും ചെയ്തു.

ശരിയായവിധം മാസ്​ക് ധരിക്കാതിരുന്ന 713 പേർക്കെതിരെയും സാമൂഹിക അകലം പാലിക്കാതിരുന്ന 560 പേർക്കെതിരെയും നടപടി സ്വീകരിച്ചതായി കമീഷണർ അറിയിച്ചു.