കോവിഡ് പ്രതിരോധം; നിയന്ത്രണം ശക്തമാക്കി തദ്ദേശ സ്ഥാപനങ്ങള്‍

കൊല്ലം: ഡി കാറ്റഗറി നിയന്ത്രണം നിലനില്‍ക്കുന്ന കരീപ്ര ഗ്രാമപഞ്ചായത്തില്‍ പൊലീസ്, സെക്ടറല്‍ മജിസ്ട്രേറ്റുമാര്‍, ആരോഗ്യവിഭാഗം ജീവനക്കാര്‍ തുടങ്ങിയവരുടെ നേതൃത്വത്തില്‍ കോവിഡ് പ്രതിരോധം ശക്തമാക്കി. കുഴിമതിക്കാട് ഹയര്‍ സെക്കൻഡറി സ്‌കൂളില്‍ പ്രവര്‍ത്തിക്കുന്ന ഗൃഹവാസ പരിചരണകേന്ദ്രത്തില്‍ 24 പേര്‍ ചികിത്സയിലുണ്ട്. തൊഴിലുറപ്പ് പദ്ധതി പ്രവര്‍ത്തനങ്ങള്‍ താൽക്കാലികമായി നിര്‍ത്തി​െവച്ചു. കശുവണ്ടി ഫാക്ടറികള്‍ കേന്ദ്രീകരിച്ച് കൂടുതല്‍ പരിശോധന തുടങ്ങി.

വീടുകള്‍, കോളനികള്‍, പൊതുഇടങ്ങള്‍ എന്നിവ കേന്ദ്രികരീച്ച്​ പ്രതിരോധ പ്രവര്‍ത്തനങ്ങള്‍ കാര്യക്ഷമമാക്കിയതായി പ്രസിഡൻറ് പി.എസ്. പ്രശോഭ പറഞ്ഞു.

അഞ്ചല്‍ ഗ്രാമപഞ്ചായത്തിെൻറ നേതൃത്വത്തില്‍ അഞ്ചല്‍ ഈസ്​റ്റ്​ ഗവ.സ്കൂളിൽ പ്രവര്‍ത്തിക്കുന്ന സി.എഫ്.എല്‍.ടി.സിയില്‍ 36 രോഗികളുണ്ട്. ജനകീയ ഹോട്ടല്‍ മുഖേന രോഗികള്‍ക്ക് ഭക്ഷണം, വാര്‍ഡുകള്‍ കേന്ദ്രീകരിച്ച് ആയുര്‍വേദ-അലോപ്പതി-ഹോമിയോ പ്രതിരോധ മരുന്നുകളുടെ വിതരണം എന്നിവ നടത്തുന്നുണ്ട്.

പോരുവഴി ഗ്രാമപഞ്ചായത്തില്‍ 30 കിടക്കകളുള്ള ഗൃഹവാസ പരിചരണകേന്ദ്രം പ്രവര്‍ത്തിക്കുന്ന കൊച്ചേരി മുക്കിലെ പ്രീ-മെട്രിക് ഹോസ്​റ്റലില്‍ അഞ്ചുരോഗികളുണ്ട്. നാല്​ വാര്‍ഡുകള്‍ വീതം ഉള്‍പ്പെടുത്തി സ്‌കൂളുകള്‍, സാംസ്‌കാരിക നിലയങ്ങള്‍ എന്നിവ കേന്ദ്രീകരിച്ച് ആൻറിജന്‍ ടെസ്​റ്റുകള്‍ തുടങ്ങി.

കൊടിക്കുന്നില്‍ സുരേഷ് എം.പിയുടെ ഫണ്ടില്‍നിന്ന് ആംബുലന്‍സിനുവേണ്ടി തുക അനുവദിച്ചതായി പ്രസിഡൻറ്​ ബിനു മംഗലത്ത് പറഞ്ഞു.

ചവറ ബ്ലോക്ക് പഞ്ചായത്തിെൻറ നേതൃത്വത്തില്‍ കോവിഡ് രോഗികളുടെയും ക്വാറൻറീനില്‍ കഴിയുന്നവരുടെയും വീടുകളില്‍ അണുനശീകരണം നടന്നുന്നുണ്ട്. വീടുകളില്‍ കഴിയുന്ന രോഗബാധിതര്‍ക്കും മറ്റ്​ രോഗങ്ങള്‍ക്ക് ചികിത്സ ആവശ്യമുള്ളവര്‍ക്കും ടെലിമെഡിസിന്‍ സൗകര്യവും ഒരുക്കിയിട്ടുണ്ട്. സി കാറ്റഗറി നിയന്ത്രണങ്ങള്‍ നിലനില്‍ക്കുന്ന പുനലൂര്‍ നഗരസഭയിലെ ചെറുകിട, വന്‍കിട കച്ചവട തൊഴിലാളികള്‍, ഓട്ടോ തൊഴിലാളികള്‍ തുടങ്ങിയവര്‍ക്ക് വ്യത്യസ്ത ഇടങ്ങളില്‍ കോവിഡ് പരിശോധന നടത്തും. വാര്‍ഡുകള്‍ തോറും ബോധവത്കരണ പ്രവര്‍ത്തനങ്ങള്‍ ശക്തമാക്കുന്നതി​െൻറ ഭാഗമായി പ്രചാരണ പ്രവര്‍ത്തനങ്ങള്‍ വ്യാപകമാക്കും.

ജാഗ്രത സമിതികളുടെ മേല്‍നോട്ടത്തില്‍ രോഗബാധിതരാകുന്നവരെ ക്വാറൻറീന്‍ ചെയ്യുന്നതിനുള്ള സജ്ജീകരണങ്ങളും ഏര്‍പ്പെടുത്തിയതായി ചെയര്‍പേഴ്‌സണ്‍ നിമ്മി എബ്രഹാം പറഞ്ഞു.