പാ​തി​യി​ൽ 'പ​ണി'​യാ​കു​ന്ന പാ​ല​ങ്ങ​ൾ

മൂ​ന്ന്​ 'സ്വ​പ്​​ന' പ​ദ്ധ​തി​ക​ളാണ് പാതിവഴിയിൽ മുടങ്ങിയത്

കൊ​ല്ലം: 'പ​ദ്ധ​തി​ക​ൾ പ്ര​ഖ്യാ​പി​ക്കു​ന്ന​തി​നും തു​ട​ങ്ങു​ന്ന​തി​നും കൈ​യും ക​ണ​ക്കു​മി​ല്ല. തു​ട​ങ്ങി​യ​ത്​ ഒ​ന്നു തീ​ർ​ന്നു​കി​ട്ടാ​ൻ എ​ത്ര​നാ​ൾ കാ​ത്തി​രി​ക്ക​ണം എ​ന്ന​തി​ന്​ ഒ​രു തി​ട്ട​വു​മി​ല്ല.' എ​ണ്ണി​യാ​ലൊ​ടു​ങ്ങാ​ത്ത ​പ​ദ്ധ​തി​ക​ൾ​കൊ​ണ്ട്​ സ​മ്പു​ഷ്ട​മാ​യ കൊ​ല്ല​ത്തി​ന്‍റെ ഭൗ​തി​ക മ​ണ്ഡ​ല​ത്തി​ന്‍റെ 'അ​വ​സ്ഥ'​യു​ടെ ആ​കെ​ത്തു​ക​യാ​ണ്. പാ​തി​വ​ഴി​യി​ൽ മു​ട​ങ്ങു​ന്ന പ​ദ്ധ​തി​ക​ൾ കൊ​ല്ലം​കാ​ർ​ക്ക്​ പു​തു​മ​യ​ല്ലാ​താ​യി​രി​ക്കു​ന്നു. ഓ​രോ പു​തി​യ പ​ദ്ധ​തി തു​ട​ങ്ങു​മ്പോ​ഴും 'കേ​ട്ടി​ട്ടു​ണ്ട്, കേ​ട്ടി​ട്ടു​ണ്ട്​' എ​ന്ന സി​നി​മ ഡ​യ​ലോ​ഗ്​ പ​റ​ഞ്ഞ്​ ത​ല​കു​ലു​ക്കു​ക​യാ​ണ​വ​ർ.

കാ​ര​ണം തു​ട​ക്ക​ത്തി​ൽ കാ​ട്ടു​ന്ന കൊ​ട്ടി​ഗ്​​ഘോ​ഷി​ക്ക​ൽ എ​ത്ര​കാ​ലം കാ​ണു​മെ​ന്ന കാ​ര്യ​ത്തി​ൽ ഇ​പ്പോ​ൾ കാ​ര്യ​മാ​യ വി​വ​രം നാ​ട്ടു​കാ​ർ​ക്കു​ണ്ട്. ക​രാ​ർ എ​ടു​ക്കു​ന്ന​വ​രി​ൽ​നി​ന്ന്​ കി​ട്ടേ​ണ്ട​ത്​ കി​ട്ടു​ന്ന​ത്​ വ​രെ മാ​ത്രം കാ​ട്ടു​ന്ന ആ​ത്മാ​ർ​ഥ​ത ക​ഴി​യു​മ്പോ​ൾ പി​ന്നെ പ​ദ്ധ​തി പൂ​ർ​ത്തി​യാ​യാ​ൽ എ​ന്ത്, ഇ​ല്ലെ​ങ്കി​ലെ​ന്ത്. ജ​നം സ​ഹി​കെ​ട്ട്​ മു​റു​മു​റു​ക്കു​മ്പോ​ൾ പ്ര​സ്താ​വ​ന​യും പ്ര​തി​ഷേ​ധ പ്ര​ഹ​സ​ന​ങ്ങ​ളു​മാ​യി ക​ളം​നി​റ​യു​ന്ന രാ​ഷ്ട്രീ​യ​ക്കാ​രെ പി​ന്നെ മ​ഷി​യി​ട്ട്​ നോ​ക്കി​യാ​ൽ കാ​ണാ​നു​ണ്ടാ​കി​ല്ല. ഉ​ദ്യോ​ഗ​സ്ഥ​രാ​ക​ട്ടെ നൈ​സാ​യി​ട്ട്​ കൈ​മ​ല​ർ​ത്തും.

കൊ​ല്ല​ത്തി​ന്‍റെ വി​ക​സ​ന​ത്തി​നു​ത​ന്നെ ശാ​പ​മാ​യ ഈ ​സ​മീ​പ​ന​ത്തി​ന്‍റെ കു​ലു​ങ്ങാ​ത്ത മൂ​ന്ന്​ ഉ​ദാ​ഹ​ര​ണ​ങ്ങ​ൾ ന​ഗ​ര​പ​രി​ധി​യി​ൽ​ത​ന്നെ ത​ല​യു​യ​ർ​ത്തി​നി​ൽ​പ്പു​ണ്ട്. ത​ല​യു​യ​ർ​ത്തി 'ഗ​തി​യ​റ്റ്​' നി​ൽ​ക്കു​ന്ന മൂ​ന്ന്​ 'സ്വ​പ്​​ന' പ​ദ്ധ​തി​ക​ൾ. വി​ശ്വ​വി​ഖ്യാ​ത​മാ​യ കൊ​ല്ലം ക​ല്ലു​പാ​ലം ആ​ദ്യ ഉ​ദാ​ഹ​ര​ണം. അ​ഷ്ട​മു​ടി​ക്കാ​യ​ലി​ന്‍റെ ന​ടു​വി​ൽ ചെ​ന്ന്​ ഇ​നി​യെ​ങ്ങോ​ട്ട്​ പോ​ക​ണ​മെ​ന്ന്​ വ​ഴി​യ​റി​യാ​തെ നി​ൽ​ക്കു​ന്ന ആ​ശ്രാ​മം ലി​ങ്ക്​ റോ​ഡ്​ പാ​ലം ര​ണ്ടാ​മ​ത്തേ​ത്. അ​ഷ്ട​മു​ടി​യു​ടെ നെ​ഞ്ചി​ൽ​ത​ന്നെ​യാ​ണ്​ മൂ​ന്നാ​മ​ത്തേ​തും, പെ​രു​മ​ൺ -പേ​ഴും​തു​രു​ത്ത്​ പാ​ലം.

നി​ല​വി​ൽ കെ​ട്ടി​നി​ർ​ത്തി​യി​രി​ക്കു​ന്ന തൂ​ണു​ക​ളി​ലെ ക​മ്പി​ക​ൾ തു​രു​മ്പെ​ടു​ത്ത്​ തീ​രും​മു​മ്പെ​ങ്കി​ലും ബാ​ക്കി നി​ർ​മാ​ണ​ത്തി​ന്‍റെ കാ​ര്യ​ത്തി​ൽ തീ​രു​മാ​നം ഉ​ണ്ടാ​കു​മോ അ​തോ കൊ​ല്ല​ത്തി​ന്‍റെ ടൂ​റി​സം ഭൂ​പ​ട​ത്തി​ൽ 'വ്യ​ത്യ​സ്ത' ടെ​സ്റ്റി​നേ​ഷ​നു​ക​ളാ​യി അ​ട​യാ​ള​പ്പെ​ടു​ത്തി ത​ൽ​സ്ഥി​തി തു​ട​രു​മോ എ​ന്നാ​ണ്​ ജ​നം ചോ​ദി​ക്കു​ന്ന​ത്.

ക​ല്ലു​പോ​ലെ ക​ല്ലു​പാ​ലം

കൊ​ല്ലം തോ​ടി​ന്‍റെ ഇ​രു​ക​ര​ക​ളെ ബ​ന്ധി​പ്പി​ച്ചി​രു​ന്ന ച​രി​ത്ര​ശേ​ഷി​പ്പി​നെ പൊ​ളി​ച്ചു​ക​ള​ഞ്ഞ്​ പ​ക​രം പു​തി​യ പാ​ലം എ​ന്ന സ്വ​പ്നം താ​ലോ​ലി​ച്ച നി​മി​ഷ​ത്തെ പ​ഴി​ക്കു​ക​യാ​ണ്​ ന​ഗ​ര​വാ​സി​ക​ൾ. ഉ​ണ്ടാ​യി​രു​ന്ന​ത്​ പൊ​ളി​ക്കു​ക​യും ചെ​യ്തു, പു​തി​യ​തൊ​ട്ട്​ കെ​ട്ടി​ത്തീ​രു​ന്നു​മി​ല്ല. ഇ​നി എ​ന്ന്​ ആ ​പ​ഴ​യ ക​ല്ലു​പാ​ലം വ​ഴി ക​ട​ന്നു​പോ​കാ​നാ​കും എ​ന്ന ചോ​ദ്യ​മു​യ​രാ​ൻ തു​ട​ങ്ങി​യി​ട്ട്​ വ​ർ​ഷം മൂ​ന്നി​നോ​ട​ടു​ക്കു​ന്നു. ഇ​പ്പോ​ൾ പാ​തി​വ​ഴി​യി​ലാ​ക്കി​യ പാ​ല​ത്തി​ന്​ മു​ന്നി​ൽ മ​ത്സ്യ​മു​ണ​ക്കു​ന്ന കാ​ഴ്ച​യാ​ണ്​ ബാ​ക്കി. 2019ൽ ​പ​ഴ​യ ക​ല്ലു​പാ​ലം പൊ​ളി​ച്ചാ​ണ്​ പ​ക​രം പു​തി​യ​ത്​ നി​ർ​മി​ക്കാ​ൻ തു​ട​ങ്ങി​യ​ത്.

അ​ക്ഷ​രാ​ർ​ഥ​ത്തി​ൽ പാ​ലം പ​ണി 'പ​ണി' ആ​കു​ന്ന കാ​ഴ്ച​യാ​യി​രു​ന്നു പി​ന്നീ​ട്. 20 മീ​റ്റ​ർ ഉ​ള്ള പാ​ല​ത്തി​ന്‍റെ നി​ർ​മാ​ണം ഇ​ഴ​ഞ്ഞി​ഴ​ഞ്ഞ്​ ര​ണ്ടേ​മു​ക്കാ​ൽ കൊ​ല്ലം കൊ​ണ്ട്​ കോ​ൺ​ക്രീ​റ്റ്​ പൂ​ർ​ത്തി​യാ​ക്ക​ൽ വ​രെ​യാ​ക്കി. പ​ല​ത​വ​ണ ക​രാ​ർ നീ​ട്ടി ന​ൽ​കി​യ​തി​ന്​ ശേ​ഷം സ​ർ​വി​സ്​ റോ​ഡ്​ ഉ​ൾ​പ്പെ​ടെ പ​ണി​ക​ൾ പി​ന്നെ​യും ബാ​ക്കി​കി​ട​ക്ക​വേ പ​ണ​മി​ല്ലെ​ന്നും ഇ​നി ജോ​ലി ന​ട​ക്ക​ണ​മെ​ങ്കി​ൽ പ​ണം ​ന​ൽ​ക​ണ​മെ​ന്നും പ​റ​ഞ്ഞ ക​രാ​റു​കാ​ര​നെ ഒ​ടു​വി​ൽ പ​റ​ഞ്ഞു​വി​ട്ടു.

ഇ​പ്പോ​ൾ പു​തി​യ ക​രാ​ർ 1.72 കോ​ടി രൂ​പ​ക്ക്​ ആ​ർ.​ടി.​എ​ഫ്​ എ​ന്ന ക​മ്പ​നി​ക്ക്​ ന​ൽ​കാ​ൻ തീ​രു​മാ​നം ആ​യി​രി​ക്കു​ക​യാ​ണ്. ഇ​നി​യൊ​രു മൂ​ന്ന്​ മാ​സം കൂ​ടി മാ​ത്രം എ​ന്ന​താ​ണ്​ ഇ​പ്പോ​ൾ കേ​ൾ​ക്കു​ന്ന വാ​ഗ്​​ദാ​നം. ഇ​ങ്ങ​നെ എ​ത്ര മൂ​ന്നു​മാ​സ​ക്ക​ണ​ക്ക്​ കേ​ട്ടി​രി​ക്കു​ന്നു എ​ന്നാ​ണ്​ കൊ​ല്ലം​കാ​രു​ടെ പ്ര​തി​ക​ര​ണം.

അ​ധി​കൃ​ത​രു​ടെ ആ​ദ്യം മു​ത​ലു​ള്ള പ്ര​ഖ്യാ​പ​ന ക​ണ​ക്ക്​ നോ​ക്കി​യാ​ൽ ഇ​തി​ന​കം മൂ​ന്ന്​ ത​വ​ണ പാ​ല​ത്തി​ന്‍റെ ഉ​ദ്​​ഘാ​ട​നം ക​ഴി​യേ​ണ്ട​താ​ണ്. എ​ന്നാ​ൽ, ഇ​നി ക​ഴി​ഞ്ഞി​ട്ട്​ ക​ഴി​ഞ്ഞു എ​ന്ന്​ പ​റ​യാം എ​ന്നാ​ണ്​ കൊ​ല്ലം നി​വാ​സി​ക​ൾ പ​റ​യു​ന്ന​ത്.

പാ​തി​യി​ൽ മു​റി​ഞ്ഞ്​ ലി​ങ്ക്​ റോ​ഡ്​ പാ​ലം

അ​ഷ്ട​മു​ടി​യെ കീ​റി​മു​റി​ച്ച്​ ഓ​ല​യി​ൽ ക​ട​വി​ൽ എ​ത്തി നി​ൽ​ക്കു​ന്ന ആ​ശ്രാ​മം ലി​ങ്ക്​ റോ​ഡ്​ പാ​ല​ത്തി​ന്​ വ​ഴി​കാ​ട്ടാ​ൻ ആ​ളു​ണ്ടോ? തോ​പ്പി​ൽ ക​ട​വി​ലേ​ക്ക്​ പാ​ല​മെ​ത്തും എ​ന്നു​ള്ള കേ​ട്ടു​കേ​ഴ്​​വി​ക്ക്​ കാ​ലം കു​റേ ആ​യെ​ങ്കി​ലും ന​ട​പ്പാ​ക്കു​ന്ന​തി​ന്‍റെ ല​ക്ഷ​ണം ഒ​ന്നും കാ​ണാ​തെ കാ​യ​ലി​ൽ പാ​തി മു​റി​ഞ്ഞു​നി​ൽ​ക്കു​ക​യാ​ണ്​ ലി​ങ്ക്​ റോ​ഡ്​ പാ​ലം. കെ.​എ​സ്.​ആ​ർ.​ടി.​സി ബ​സ്​ സ്റ്റാ​ൻ​ഡ്​ മു​ത​ൽ ഓ​ല​യി​ൽ ക​ട​വ്​ മൂ​ന്നാം ഘ​ട്ടം പൂ​ർ​ത്തി​യാ​യാ​ൽ നാ​ലാം ഘ​ട്ടം അ​പ്പോ​ൾ തു​ട​ങ്ങും എ​ന്നാ​യി​രു​ന്നു വാ​ഗ്ദാ​നം.

എ​ന്നാ​ൽ, ഇ​പ്പോ​ൾ വാ​ഗ്ദാ​നം മാ​ത്ര​മേ ഉ​ള്ളൂ അ​ല്ലേ എ​ന്ന്​ ​അ​ധി​കൃ​ത​രോ​ട്​ ചോ​ദി​ക്കേ​ണ്ട​നി​ല​യി​ലാ​ണ്​ കാ​ര്യ​ങ്ങ​ൾ.

103 കോ​ടി മു​ട​ക്കി ഓ​ല​യി​ൽ ക​ട​വ്​ വ​രെ​യു​ള്ള 1100 മീ​റ്റ​ർ ഫ്ലൈ​ഓ​വ​ർ ഉ​ൾ​പ്പെ​ടെ മൂ​ന്നാം ഘ​ട്ടം പൂ​ർ​ത്തി​യാ​ക്കി, പെ​യി​ന്‍റും അ​ടി​ച്ച്​ സൗ​ന്ദ​ര്യ​വ​ത്​​ക​ര​ണ​വും ന​ട​ത്തി ഉ​ദ്​​ഘാ​ട​നം പൊ​ടി​​പൊ​ടി​ക്കാ​നു​ള്ള ത​യാ​റെ​ടു​പ്പ്​ ന​ട​ക്കു​ക​യാ​ണ്.

എ​ന്നാ​ൽ, ഓ​ല​യി​ൽ ക​ട​വി​ൽ​നി​ന്ന്​ തോ​പ്പി​ൽ​ക​ട​വ്​ വ​രെ​യു​ള്ള 1165.60 മീ​റ്റ​ർ ദൂ​ര​ത്തി​ൽ പാ​ലം കെ​ട്ടാ​ൻ കി​ഫ്​​ബി​യി​ൽ​നി​ന്ന്​ 170 കോ​ടി അ​നു​വ​ദി​ച്ച​ത്​ മി​ച്ചം. ​

പാ​ലം ഇ​നി​യെ​ങ്ങോ​ട്ട്​ പോ​ക​ണം എ​ന്ന ചോ​ദ്യം ആ ​പാ​ലം​പോ​ലെ ത​ന്നെ പാ​തി​വ​ഴി​യി​ൽ നി​ൽ​ക്കു​ക​യാ​ണ്. തേ​വ​ള്ളി പാ​ല​ത്തി​ന്​ അ​ടി​യി​ലൂ​ടെ വേ​ണം നാ​ലാം ഘ​ട്ട​ത്തി​ൽ പാ​ലം ക​ട​ന്നു​പോ​കാ​ൻ. ഇ​തു​ൾ​പ്പെ​ടെ പൊ​തു​മ​രാ​മ​ത്ത്​ വി​ദ​ഗ്​​ധ​ർ ത​യാ​റാ​ക്കി​യ പ്ലാ​ൻ കി​ഫ്​​ബി സാ​​ങ്കേ​തി​ക വി​ദ​ഗ്​​ധ​ർ​ക്ക്​ പി​ടി​കി​ട്ടാ​ത്ത​താ​ണ്​ അ​നി​ശ്ചി​ത​ത്വ​ത്തി​ന്​ കാ​ര​ണം. ഈ ഇടയ്ക്കും വിഷയത്തിൽ വ്യക്തത വരുത്താൻ കി​ഫ്​​ബി വിദഗ്ധർ സ്ഥലം സന്ദർശിച്ചിരുന്നു.നാ​ലു കൊ​ല്ല​ത്തോ​ള​മാ​യി തു​ട​രു​ന്ന ഇ​ക്കാ​ര്യ​ത്തി​ലെ സം​ശ​യം ഈ​യി​ട​ക്കൊ​ന്നും തീ​രു​മെ​ന്ന പ്ര​തീ​ക്ഷ​യി​ല്ല.

എന്നാൽ, പ​ദ്ധ​തി​ക്ക്​ അ​നു​മ​തി കി​ട്ടി പ​ണി തു​ട​ങ്ങാ​ൻ ഇ​നി​യും കാ​ലം പ​ല​ത്​ വേ​ണ​മെ​ന്ന സ്ഥി​തി മൂ​ന്നാം ഘ​ട്ട​ത്തി​ന്‍റെ ഉ​ദ്​​ഘാ​ട​നം ക​ഴി​ഞ്ഞാ​ലും തു​ട​രു​മെ​ന്ന​താ​ണ്​ അവസ്ഥ. അ​തു​വ​രെ നാ​ട്ടു​കാ​ർ​ക്ക്​ ​'സെ​ൽ​ഫി പോ​യ​ന്‍റ്​' ആ​കാ​നാ​യി​രി​ക്കും ഓ​ല​യി​ൽ​ക​ട​വി​ൽ പാ​ല​ത്തി​ന്‍റെ വി​ധി.

ഇ​രു​ക​ര തൊ​ടാ​ൻ കാ​ത്ത്​...

ദ്രു​​ത​ഗ​തി​യി​ൽ ഇ​രു​വ​ശ​ത്തു​നി​ന്നും നി​ർ​മാ​ണം പൂ​ർ​ത്തി​യാ​ക്കി ന​ടു​വി​ലെ​ത്തി​യ​പ്പോ​ൾ ബാ​ക്കി നി​ർ​മാ​ണ​ത്തി​ന്​ ആ​ദ്യം ത​യാ​റാ​ക്കി​യ ഡി​സൈ​ൻ ത​ന്നെ പ​റ്റി​ല്ലെ​ന്ന്​ ക​ണ്ട്​ പാ​തി വ​ഴി​യി​ലാ​യ ക​ഥ​യാ​ണ്​ പെ​രു​മ​ൺ-​പേ​ഴും​തു​രു​ത്ത്​ പാ​ല​ത്തി​ന്.

അ​ഷ്ട​മു​ടി​ക്കാ​യ​ലി​ന്​ മ​ധ്യേ, പെ​രു​മ​ൺ റെ​യി​ൽ​വേ പാ​ല​ത്തി​ന്​ സ​മാ​ന്ത​ര​മാ​യി നി​ർ​മി​ക്കു​ന്ന പാ​ല​ത്തി​ന്‍റെ നി​ർ​മാ​ണം ഡി​സൈ​നി​ൽ കു​രു​ങ്ങി നി​ല​ച്ചി​രി​ക്കു​ക​യാ​ണ്. പു​തി​യ ഡി​സൈ​ന്​ വേ​ണ്ടി ക​രാ​ർ ക്ഷ​ണി​ച്ചി​രി​ക്കു​ക​യാ​ണ്​ കേ​ര​ള റോ​ഡ്​ ഫ​ണ്ട്​ ബോ​ർ​ഡ്.

പെ​രു​മ​ണി​നെ​യും പേ​ഴും​തു​രു​ത്തി​നെ​യും ബ​ന്ധി​പ്പി​ക്കു​ന്ന 432 മീ​റ്റ​ർ ഉ​ള്ള പാ​ല​ത്തി​ന്‍റെ ന​ടു​വി​ലെ 70 മീ​റ്റ​ർ പൂ​ർ​ത്തി​യാ​ക്കാ​നാ​ണ്​ അ​പ്ര​തീ​ക്ഷി​ത ​പ്ര​തി​സ​ന്ധി വ​ന്ന​ത്. കി​ഫ്​​ബി​യി​ൽ​നി​ന്നു​ള്ള 42 കോ​ടി ചെ​ല​വ​ഴി​ച്ചാ​ണ്​ പാ​ലം നി​ർ​മി​ക്കു​ന്ന​ത്. മ​ധ്യ​ഭാ​ഗ​ത്ത്​ തൂ​ണു​ക​ളി​ൽ​നി​ന്ന്​ ഇ​രു​മ്പ്​ കേ​ബി​ളു​ക​ൾ ഘ​ടി​പ്പി​ച്ച്​ കേ​ബി​ൾ പാ​ലം നി​ർ​മി​ക്കാ​നാ​യി​രു​ന്നു പ​ദ്ധ​തി. മ​ധ്യ​ഭാ​ഗ​ത്തെ തൂ​ണി​ൽ​നി​ന്ന്​ ഇ​രു​മ്പു​കേ​ബി​ളു​ക​ൾ​കൊ​ണ്ട്​ സ്പാ​ൻ ബ​ന്ധി​പ്പി​ക്കു​ക​യാ​യി​രു​ന്നു ല​ക്ഷ്യം. എ​ന്നാ​ൽ, ഇ​തി​നാ​യു​ള്ള സാ​​ങ്കേ​തി​ക​വി​ദ്യ പ്രാ​യോ​ഗി​ക​മ​ല്ലെ​ന്ന്​ ഈ ​ഭാ​ഗ​ത്തെ നി​ർ​മാ​ണം തു​ട​ങ്ങു​ന്ന​തി​നു​ മു​മ്പ്​ ക​ണ്ടെ​ത്തി. ഡി​സൈ​നി​ൽ മാ​റ്റം വ​രു​ത്തി​യാ​ൽ നി​ർ​മാ​ണം പൂ​ർ​ത്തി​യാ​ക്കാ​മെ​ന്ന്​ ക​രാ​ർ ക​മ്പ​നി വ്യ​ക്ത​മാ​ക്കി​യ​തോ​ടെ​യാ​ണ്​ പു​തി​യ ക​രാ​ർ ക്ഷ​ണി​ച്ച​ത്. പു​തി​യ ക​രാ​ർ വ​ന്ന്​ നി​ർ​മാ​ണം പൂ​ർ​ത്തി​യാ​ക്കാ​ൻ എ​ത്ര​കാ​ലം ഇ​നി​യും കാ​ത്തി​രി​ക്ക​ണം എ​ന്ന ചോ​ദ്യ​മു​യ​ർ​ത്തി കാ​ത്തി​രി​ക്കു​ക​യാ​ണ്​ ഇ​പ്പോ​ൾ നാ​ട്.