അഭ്യാസത്തിനൊടുവിൽ ലൈസൻസ്​ നഷ്​ടം -Video

കൊല്ലം: ലക്ഷങ്ങൾ വില‍യുള്ള ബൈക്കിൽ തീരദേശ റോഡിലൂടെ യുവാവിന്‍റെ സ്​റ്റണ്ട്. അഭ്യാസം പരിധിവിട്ടപ്പോൾ പൊലീസ് പിടികൂടി സ്​റ്റേഷനിലെത്തിച്ചു. ഒരു ദിവസം കഴിഞ്ഞ് ബൈക്ക് വിട്ടുകൊടുത്തപ്പോൾ സ്​റ്റേഷനിൽനിന്നിറങ്ങി വീണ്ടും അഭ്യാസം. പോരാത്തിതിന്​ സമൂഹമാധ്യമങ്ങളിൽ വിഡിയോ പ്രചരിപ്പിച്ച് വിജയാരവം മുഴക്കലും. എല്ലാം കഴിഞ്ഞപ്പോൾ ബൈക്കോടിക്കാനുള്ള ലൈസൻസ് പോയികിട്ടി. കാവനാട് സ്വദേശി നിതീഷാണ്​ (22) കഥയിലെ താരം.

ഓവർ സ്പീഡിനും റോഡിൽ സ്​റ്റണ്ട് നടത്തിയതിനും പരവൂർ പൊലീസാണ് യുവാവിനെ പിടികൂടിയത്. നിയമലംഘനത്തിന്​ പിഴയീടാക്കി വിട്ടയച്ചപ്പോൾ സ്​റ്റേഷന്​ മുന്നിൽ വീണ്ടും ബൈക്കിൽ അഭ്യാസം കാണിച്ചു. സുഹൃത്ത് എടുത്ത വിഡിയോ യുവാവ് സമൂഹമാധ്യമങ്ങളിൽ പങ്കുവെച്ചതോടെ 'പണി' പിന്നാലെ വരുമെന്ന മുന്നറിയിപ്പിൽ വിഡിയോ പൊലീസും പങ്കുവെച്ചു. സ്​റ്റേഷനിൽ നിന്നിറങ്ങിയപ്പോൾതന്നെ ബൈക്കിന്‍റെ പിൻവശം പൊക്കി അഭ്യാസം കാണിച്ച യുവാവിനെ തിരികെ ബൈക്ക് ഉരുട്ടിച്ച് സ്​റ്റേഷനിൽ എത്തിക്കുന്ന വിഡിയോയാണ് പൊലീസ് നർമത്തിന്‍റെ അകമ്പടിയോടെ പങ്കുവെച്ചത്.

പൊലീസ് സ്​റ്റേഷനിൽനിന്ന് പുറത്തിറങ്ങി അഭ്യാസം കാട്ടുന്ന വിഡിയോ സമൂഹമാധ്യമങ്ങളിൽ വൈറലായതോടെ ബൈക്ക് പിടികൂടാൻ പൊലീസ് മോട്ടോർ വാഹനവകുപ്പിന്‍റെ സഹായം തേടി. കൊല്ലം എൻഫോഴ്സ്മെൻറ് ആർ.ടി.എ എ.കെ. ദിലുവിന്‍റെ തന്ത്രപരമായ നീക്കത്തിലൂടെ കല്ലുംതാഴത്തുവെച്ച് യുവാവിനെ ബൈക്കുമായി കസ്​റ്റഡിയിലെടുത്തു. വിവരം അറിയിച്ചതിനെതുടർന്ന് എത്തിയ പരവൂർ പൊലീസിന്​ കൈമാറി. സ്​റ്റേഷനിൽനിന്ന് അഭ്യാസം കാണിച്ചിറങ്ങിപ്പോയ യുവാവിനെ തിരികെ എത്തിച്ചപ്പോൾ ബൈക്ക് ഉരുട്ടി എത്തുന്നരീതിയിൽ വിഡിയോ പൊലീസ് ഉദ്യോഗസ്ഥരാണ് ചിത്രീകരിച്ചത്.

നിതീഷി​െൻറ ലൈസൻസ് സസ്പെൻഡ് ചെയ്തതായി എൻഫോഴ്സ്മെൻറ് ആർ.ടി.ഒ എ.കെ. ദിലു അറിയിച്ചു. 2.3 ലക്ഷം രൂപ വിലയുള്ള ബൈക്കാണ്. പല ഭാഗത്തും രൂപമാറ്റം വരുത്തിയിരുന്നു. ആർ.സി ബുക്ക് റദ്ദാക്കണമോയെന്ന് പരിശോധിച്ചുവരികയാണ്.