എം.ഡി.എം.എയുമായി നാലുപേർ പിടിയിൽ

അഞ്ചൽ: വാഹന പരിശോധനക്കിടെ 1.810 ഗ്രാം എം.ഡി.എം.എയുമായി നാല് യുവാക്കളെ ഏരൂർ പൊലീസ് അറസ്റ്റ് ചെയ്തു. ഭാരതീപുരം തോലൂർ പുത്തൻവീട്ടിൽ സിബിൻഷാ (26), ഭാരതീപുരം വേങ്ങവിള വീട്ടിൽ ആരിഫ്ഖാൻ (26), കൊല്ലം തട്ടാമല കുളങ്ങര ക്ഷേത്രത്തിന് സമീപം ചാത്തുകാട്ട് വീട്ടിൽ അബി (25), കുളത്തൂപ്പുഴ വലിയേല ഷെഫിൻ മൻസിലിൽ ഷിഫാൻ (22) എന്നിവരാണ് അറസ്റ്റിലായത്.

കഴിഞ്ഞ ദിവസം പൂവണത്തുംമൂട് ഓയിൽപാം എസ്റ്റേറ്റിന് സമീപം പൊലീസിന്‍റെ വാഹന പരിശോധന നടക്കുന്നതിനിടെ ഇതുവഴിയെത്തിയ കാറിൽ നടത്തിയ പരിശോധനയിലാണ് എം.ഡി.എം.എയും ഇത് ഉപയോഗിക്കുന്നതിനായുള്ള ഗ്ലാസ് ഡ്രഗ് പൈപ്പ്, ഗ്ലാസ് ജാർ, സിഗരറ്റ് ലൈറ്റർ എന്നിവ പിടിച്ചെടുത്തത്.

ഏരൂർ ഇൻസ്പെക്ടർ എം.ജി. വിനോദ് കുമാർ, എസ്.ഐ ശരലാൽ, എ.എസ്.ഐ ശ്രീകുമാർ, സി.പി.ഒമാരായ അനിമോൻ, തുശാന്ത് എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.