പതിനാറുകാരിയെ ബലാത്സംഗം ചെയ്​ത കേസിൽ മൂന്നാം പ്രതിയും​ പിടിയിൽ

ഓയൂർ: പതിനാറുകാരിയെ ബലാത്സംഗം ചെയ്​ത കേസിൽ മൂന്നാം പ്രതിയെ ചടയമംഗലം പൊലീസ്​ അറസ്​റ്റ്​ ചെയ്തു. പൂയപ്പള്ളി മരുതമൺപള്ളി കാറ്റാടി സ്വദേശി ആഷിഷ് (24) ആണ് പിടിയിലായത്. ഇയാൾക്കൊപ്പം പെൺകുട്ടിയെ ബലാത്സംഗം ചെയ്​ത ചടയമംഗലം സ്വദേശികളായ അസറുദീൻ, അഫ്സൽ എന്നിവരെ നേരത്തേ അറസ്​റ്റ്​ ചെയ്തിരുന്നു. റിമാൻഡിലായ ഇവർ ഇപ്പോൾ ജാമ്യത്തിലാണ്.

കഴിഞ്ഞ വർഷം നവംബർ 25 നാണ് കേസിനാസ്​പദമായ സംഭവം. ചടയമംഗലം സ്വദേശിയായ പെൺകുട്ടിയെ പരിചയപ്പെട്ട സംഘത്തിലെ അസറുദീൻ വീട്ടിൽനിന്ന്​ വിളിച്ചിറക്കി ആഷിഷിെൻറ കാറിൽ പരവൂർ കാപ്പിൽ ശലഭം ലോഡ്ജിൽ എത്തിച്ച് ബലാൽകാരം ചെയ്യുകയായിരുന്നു.

പെൺകുട്ടിയുടെ മൊഴിയുടെ അടിസ്​ഥാനത്തിൽ അസറുദീനെയും അഫ്സലിനെയും ചോദ്യം ചെയ്തതിൽനിന്നുമാണ് പൂയപ്പള്ളി കാറ്റാടി സ്വദേശിയായ ആഷിഷിനെക്കുറിച്ച് വിവരം ലഭിച്ചത്. ചടയമംഗലം ഇൻസ്​പെക്ടർ പ്രദീപ്കുമാറിെൻറ നേതൃത്വത്തിലുള്ള സംഘമാണ് അറസ്​റ്റ്​ ചെയ്തത്.