38 കുപ്പി വിദേശ മദ്യവുമായി യുവാവ് പൊലീസ്​ പിടിയിൽ

കിളികൊല്ലൂർ: ആമക്കോട് വയൽ, പേരൂർ, കുറ്റിച്ചിറ എന്നീ സ്ഥലങ്ങളിൽ അനധികൃതമായി വിദേശ മദ്യം ശേഖരിച്ചുവെച്ച് ഡ്രൈഡേ ദിനങ്ങളിൽ വിൽപന നടത്തിവന്നയാൾ പിടിയിൽ. മങ്ങാട് അപ്പോളോ നഗർ വരുവിളവീട്ടിൽ ഷിബുലാൽ (36) ആണ് കിളികൊല്ലൂർ പൊലീസിന്‍റെ ദീർഘകാല നിരീക്ഷണത്തിനൊടുവിൽ പിടിയിലായത്. പലപ്പോഴായി ബീവറേജസ്​​ കോർപറേഷന്‍റെ ഔട്ട്​ലെറ്റുകളിൽ നിന്നും വാങ്ങി ശേഖരിച്ചുവന്നിരുന്ന മദ്യം ഡ്രൈഡേ ദിനങ്ങളിൽ ഇരട്ടി വിലക്ക് വിൽപന നടത്തി വരുകയായിരുന്നു ഷിബുലാൽ. കൊല്ലം സിറ്റി അസിസ്​റ്റന്‍റ്​ കമീഷണർ ജി.ഡി. വിജയകുമാറിന്‍റെ നിർദേശാനുസരണം കിളികൊല്ലൂർ ഇൻസ്​പെക്ടർ കെ. വിനോദിന്‍റെ നേതൃത്വത്തിൽ ഇയാൾക്ക് വേണ്ടി പ്രത്യേക അന്വേഷണ സംഘം രൂപവത്​കരിച്ച്​ അന്വേഷണം നടത്തിവരുകയായിരുന്നു. അറുനൂറ്റിമംഗലം, തേവള്ളിയിൽ അടഞ്ഞുകിടക്കുന്ന വർക്ക്ഷോപ്പിന് സമീപം വിദേശമദ്യത്തിന്‍റെ വൻ ശേഖരവുമായി പ്രതിയെത്തുമെന്ന്​ വിവരം ലഭിച്ചതിന്‍റെ അടിസ്ഥാനത്തിലെത്തിയ അന്വേഷണ സംഘം അറസ്റ്റ്​ ചെയ്യുകയായിരുന്നു. പ്രതിയുടെ കൈയിലുണ്ടായിരുന്ന വലിയ ബാഗിലും സഞ്ചികളിലുമായി ഒരു ലിറ്ററിന്‍റെ 38 കുപ്പി വിദേശ മദ്യമാണ് പിടിച്ചെടുത്തത്. കൂടുതൽ മദ്യശേഖരത്തിന്‍റെ ഉറവിടം പൊലീസ്​ അന്വേഷിച്ചുവരുകയാണ്. അന്വേഷണസംഘത്തിൽ എസ്​.ഐമാരായ എ.പി. അനീഷ്, വി. സ്വാതി, കെ.ജയൻ, സക്കറിയ, മധു, എ.എസ്.​ഐ സി. സന്തോഷ്​കുമാർ, ഡെൽഫിൻ, ബോണിഫേസ്​, സി.പി.ഒ മാരായ പി.കെ. സജി, ടി.സാജ്, പ്രശാന്ത്, എം. അനീഷ്, ഇമ്മാനുവേൽ പെരേര എന്നിവരാണ് പ്രതിയെ അറസ്​റ്റ് ചെയ്തത്.