സീറോ ടു 92

പൂജ്യത്തിൽ നിന്ന്​ തുടങ്ങി 92 ശതമാനം മാർക്ക്​ വാങ്ങുക ആർക്കും എളുപ്പമല്ല. ​കൊല്ലം ജില്ല ആശുപത്രിക്കും എളുപ്പമായിരുന്നില്ല കാര്യങ്ങൾ. പൊട്ടിയൊലിക്കുന്ന സെപ്​റ്റിക്​ ടാങ്ക്​ മാലിന്യത്തിന്​ പേരുകേട്ട ആ സ്ഥാപനം പക്ഷേ, സംസ്ഥാനത്ത്​ ശുചിത്വത്തിന്​ ഒന്നാം സ്ഥാനം നേടിയിരിക്കുന്നു, 92. 75 എന്ന അഭിമാനാർഹമായ സ്​കോറോടെ. ശുചിത്വം, അണുബാധ നിയന്ത്രണം എന്നീ മേഖലയിലെ മികവിന്​ 'കായകൽപ്'​ പുരസ്കാരത്തിൽ സംസ്ഥാനത്ത്​ ഒന്നാംസ്ഥാനത്ത്​ എത്തിയപ്പോൾ തൊട്ടുചേർന്ന്​ നിൽക്കുന്നത്​ ​എറണാകുളം ജനറൽ ആശുപത്രിയാണ്​. ഒറ്റരാത്രി കൊണ്ടുണ്ടായ മാറ്റമല്ല ഈ നേട്ടം കൊണ്ടുവന്നത്​. ഏതാനും വർഷങ്ങളായി കഠിനപ്രയത്​നത്തിലൂടെ നേടിയെടുത്തതാണ്​ എന്ന്​ ജില്ലയിലെ ആരോഗ്യ നേതൃത്വം ഒന്നാകെ സാക്ഷ്യം പറയുന്നു. ഇന്ന്​ കൊല്ലം ജില്ല ആശുപത്രിയിൽ പൊട്ടിയൊലിക്കുന്ന സെപ്​റ്റിക്​ ടാങ്ക്​ ഇല്ല. അതെല്ലാം പഴയ കഥ. ശുചീകരണത്തിനും മാലിന്യ സംസ്കരണത്തിനും അണുബാധ നിയന്ത്രണത്തിലുമെല്ലാം സംസ്ഥാനത്ത്​ മറ്റേതൊരു ആശുപത്രിയോടും കിടപിടിക്കുന്ന സംവിധാനമാണ്​ കൊല്ലത്തിന്‍റെ സ്വന്തം എ.എ. റഹീം മെമ്മോറിയൽ ആശുപത്രിയിലും ഇന്നുള്ളത്​. സി.ടി, എം.ആർ.ഐ, ലബോറട്ടറി എന്നിങ്ങനെ സേവനങ്ങളെല്ലാം സ്വകാര്യ ആശുപത്രികളെ അപേക്ഷിച്ച്​ മൂന്നിലൊന്ന്​ നിരക്കിലാണ്​ ഇവിടെ ലഭ്യമാകുന്നത്​. ആർദ്രം മിഷന്‍റെയും ജില്ല പഞ്ചായത്തിന്‍റെയും വിവിധ പദ്ധതികളും നല്ല രീതിയിൽ യാഥാർഥ്യമാക്കിയതും ആശുപത്രിയുടെ മികവുയർത്തി. കായകൽപ്​ എന്ന മികവ്​ എത്തിയതോടെ ഇനി എൻ.ക്യു.എ.എസ്​ നേടാനുള്ള തയാറെടുപ്പിലാണ്​ ആശുപത്രിയും ​ആരോഗ്യവകുപ്പും. ............................ ജീവനക്കാരുടെ ഒത്തൊരുമ കോവിഡ്​ കാരണം നഷ്ടത്തിലായ സർക്കാർ ആശുപത്രിക്ക്​ പെയിന്‍റ്​ അടിക്കാൻ ജീവനക്കാർ തന്നെ മുന്നിട്ടിറങ്ങുന്ന അപൂർവത. പുറത്ത്​ നിന്ന്​ ആളെ നിർത്തി ജോലി ചെയ്യിക്കാൻ സ്വന്തം ശമ്പളം പകുത്തുനൽകുന്ന മാതൃക. കൊല്ലം ജില്ല ആശുപത്രിയുടെ നേട്ടത്തിന്​ പിന്നിൽ സ്ഥാപനത്തെ സ്വന്തമായി കണ്ട്​ സ്വാർഥതയില്ലാതെ പ്രവർത്തിച്ച ഒരു സംഘം ജീവനക്കാരുടെ പങ്ക്​ തന്നെയാണ്​ മുന്നിൽ നിൽക്കുന്നത്​. ശുചീകരണത്തിനായാലും ആശുപത്രി ഇതര ജോലികൾക്കായാലും മുന്നിട്ടിറങ്ങുന്ന ജീവനക്കാർ എൻ.എച്ച്​.എം അധികൃതരെയും അതിശയിപ്പിച്ചു. പച്ചക്കറി, ഔഷധസസ്യം, പൂന്തോട്ടം എന്നിങ്ങ​നെ ആശുപത്രി പരിസരത്തിന്‍റെ മുഖച്ഛായ മാറ്റിയ പ്രവർത്തനങ്ങളിൽ എല്ലാം ജീവനക്കാരുടെ പങ്ക്​ എടുത്തുപറയേണ്ടതാണ്​. ............................ നിസ്വാർഥ പ്രവർത്തനത്തിന്‍റെ വിജയം വർഷങ്ങൾക്ക്​ മുമ്പുണ്ടായിരുന്ന ജില്ല ആശുപത്രി ഇന്ന്​ അടിമുടി മാറിയിരിക്കുന്നു. ഇതിനായി പ്രയത്നിച്ച ജീവനക്കാരുടെ നിസ്വാർഥ പ്രവർത്തനത്തിന്‍റെ വിജയമാണ്​ പുരസ്കാര നേട്ടം. വിവിധ ​പദ്ധതികൾ വിജയകരമായി നടപ്പാക്കാൻ കഴിയുന്നതും മികവിന്​ കാരണമാണ്​. ദേശീയ നിലവാരത്തിലേക്ക്​ ഉയരാനുള്ള പ്രവർത്തനങ്ങൾ ശക്തമായി മുന്നോട്ടുപോകുന്നു. വൈകാതെ ആ നേട്ടവും സ്വന്തമാക്കാനാകും. ഡോ. വസന്തദാസ്​, കൊല്ലം ജില്ല ആശുപത്രി സൂപ്രണ്ട്​