കാഷ്യൂ കോർപറേഷനിൽ 535 തൊഴിലാളികൾക്ക് കൂടി സ്ഥിരനിയമനം

* ഷെല്ലിങ്​, പീലിങ്​, ഗ്രേഡിങ്​ വിഭാഗങ്ങളിലാണ് നിയമനം നൽകുക കൊല്ലം: കേരള സംസ്ഥാന കശുവണ്ടി വികസന കോർപറേഷന്‍റെ കണ്ണൂർ, തൃശൂർ, ആലപ്പുഴ, കൊല്ലം, തിരുവനന്തപുരം ജില്ലകളിൽ പ്രവർത്തിക്കുന്ന 30 ഫാക്ടറികളിലായി 535 തൊഴിലാളികൾക്ക് കൂടി സ്ഥിരനിയമനം നൽകുന്നു. ഷെല്ലിങ്​, പീലിങ്​, ഗ്രേഡിങ്​ വിഭാഗങ്ങളിലാണ് നിയമനം നൽകുന്നത്. പ്രായോഗിക പരീക്ഷ നടത്തി റാങ്ക് ലിസ്​റ്റ് പ്രസിദ്ധീകരിച്ചാണ് നിയമനം. അടച്ചിട്ട ഫാക്ടറികളിലും സ്വകാര്യ ഫാക്ടറികളിലുമായി തൊഴിൽ നഷ്ടപ്പെട്ടവർക്ക് മുൻഗണന നൽകിയാണ് നിയമനം നൽകുന്നത്. കഴിഞ്ഞ അഞ്ച് വർഷത്തിനിടയിൽ 6000 തൊഴിലാളികൾക്ക് പുതിയതായി തൊഴിൽ നൽകിയിരുന്നു. പുതിയതായി നിയമനം ലഭിച്ചവർക്ക് ചൊവ്വാഴ്ച രാവിലെ എട്ടിന്​ കാഷ്യൂ കോർപറേഷന്‍റെ അയത്തിൽ ഫാക്ടറി അങ്കണത്തിൽ മന്ത്രി പി. രാജീവ് നിയമന ഉത്തരവ് നൽകും. ഫാക്ടറിയിൽ പുതിയതായി സ്ഥാപിച്ച പാക്കിങ് മെഷീന്‍റെ സ്വിച്ച് ഓൺ കർമവും മന്ത്രി നിർവഹിക്കും. ചെയർമാൻ എസ്​. ജയമോഹൻ അധ്യക്ഷത വഹിക്കും. മേയർ പ്രസന്ന ഏണസ്​റ്റ്, എൻ.കെ. പ്രേമചന്ദ്രൻ എം.പി, വിവിധ ട്രേഡ് യൂനിയൻ നേതാക്കളും ജനപ്രതിനിധികളും പ​ങ്കെടുക്കുമെന്ന്​ ചെയർമാൻ എസ്.​ ജയമോഹനും മാനേജിങ്​ ഡയറക്ടർ ഡോ. രാജേഷ് രാമകൃഷ്ണനും അറിയിച്ചു.