യുവജനോത്സവം 4

ആവേശത്തോ​ടൊഴുകി യുവത്വം കൊല്ലം: കേരള സർവകലാശാല യൂനിയൻ യുവജനോത്സവത്തി‍ൻെറ ആദ്യദിനത്തിൽ ആവേശത്തോടെ ഒഴുകിയെത്തി യുവത്വം. രാവിലെ മുതൽ എസ്​.എൻ കോളജ്​ കാമ്പസിലേക്ക്​ മത്സരാർഥികളും കാണികളുമായി ആയിരങ്ങളാണ്​ നിറഞ്ഞെത്തിയത്​. മത്സരങ്ങളില്ലായിരുന്നിട്ടും ആവേശമൊട്ടും ചോരാതെ സൗഹൃദവർത്തമാനങ്ങൾ പറഞ്ഞും കളിചിരികൾ പങ്കിട്ടും അവർ മണിക്കൂറുകൾ ചെലവഴിച്ചു. ഇടക്കിടക്ക്​ വന്ന മഴക്കാറിനും ആ ആവേശത്തിനെ തണുപ്പിച്ചില്ല. വൈകീട്ട്​ 'ആക്ടീവ്​ റേഡിയോ' ബാൻഡി‍ൻെറ പാട്ടുകൾ ആസ്വദിക്കാനും നിറഞ്ഞ സദസ്സ്​​ ആവേശത്തോടെയാണ്​ എത്തിയത്​. ഉദ്​ഘാടന ചടങ്ങിന്​ മുമ്പ്​ സദസ്സിനെ കൈയിലെടുത്ത്​ ഒരു മണിക്കൂറോളം ബാൻഡ്​ പാട്ടുകൾ അവതരിപ്പിച്ചു. ആറേകാലോടെയാണ്​ ഉദ്​ഘാടന ചടങ്ങിന്​ തുടക്കമായത്​. അധ്യക്ഷയായ മേയർ ​പ്രസന്ന ഏണസ്റ്റ്​ പ്രസംഗം തുടങ്ങിയപ്പോഴേക്കും വലിയൊരുസംഘം തിരിച്ചുപോക്ക്​ ആരംഭിച്ചിരുന്നു. മന്ത്രിയുടെ ഉദ്​ഘാടനപ്രസംഗം കേൾക്കാൻ സദസ്സിൽ ഇരുന്നതിനേക്കാൾ കൂടുതൽ പേർ പുറത്തുനിൽക്കുന്നതായിരുന്നു കാമ്പസിലെ കാഴ്ച. ഒന്നര മണിക്കൂറോളം നീണ്ട ഉദ്​ഘാടന ചടങ്ങിനൊടുവിലാണ്​ പ്രധാന വേദിയിലെ ആദ്യ ഇനമായ മോഹിനിയാട്ടത്തിന്​ ​നറുക്കെടുപ്പ്​ നടന്നത്​. 41 പേരാണ്​ മോഹിനിയാട്ടത്തിന്​ ചമയമണിഞ്ഞെത്തിയത്​. ഒരു മണിക്കൂർ നീണ്ട ഇടവേളക്കുശേഷം രാത്രി ഒമ്പത്​ കഴിഞ്ഞാണ്​ മോഹിനിയാട്ടത്തിന്​ തുടക്കമായത്​. അപ്പോഴും കാഴ്ചക്കാരായി നല്ലൊരു സദസ്സ്​​ കാത്തിരുന്നു. എസ്​.എൻ വനിത കോളജിലെ വേദിയിൽ നടന്ന കഥകളിയിൽ ഏഴുപേരും ഫാത്തിമ മാത നാഷനൽ കോളജിൽ നടന്ന ഗസലിൽ 36 പേരും ആദ്യദിനം മാറ്റുരച്ചു. മണിക്കൂറുകൾ നീണ്ട മത്സരകാഴ്ചകൾക്കൊപ്പം ആവേശവുമായി സദസ്സും ഉണർന്നിരുന്നു.