പി.എസ്​.സി പരീക്ഷ തട്ടിപ്പ്: ആദ്യ കേസിന്റെ അന്തിമ വാദം ജൂൺ 22ന്

കൊല്ലം: 2010ൽ കൊല്ലം കേന്ദ്രീകരിച്ച് നടന്ന പി.എസ്​.സി പരീക്ഷ തട്ടിപ്പ് കേസുകളിലെ ആദ്യകേസിന്‍റെ വിചാരണ പൂർത്തിയായി. അന്തിമ വാദം ജൂൺ 22ന്​ കൊല്ലം ചീഫ് ജുഡീഷ്യൽ മജിസ്ട്രേറ്റ് എസ്. രമേശ് കുമാറിന്‍റെ കോടതിയിൽ നടക്കും. 2010 ഒക്ടോബർ 12ന് പി.എസ്​.സി നടത്തിയ സബ് ഇൻസ്പെക്ടർ ​ട്രെയിനി പരീക്ഷയിൽ തട്ടിപ്പ്​ നടത്തിയ കേസിന്‍റെ വിചാരണയാണ്​ പൂർത്തിയായത്. കേസിലെ ഒന്നാം പ്രതി മുകുന്ദപുരം ചവറ വരുവിളവീട്ടിൽ ബൈജു ഇടതുതോളിൽ ഒട്ടിച്ചു​െവച്ച മൊബൈൽ ഫോൺ വഴി, രണ്ടാം പ്രതി തേവലക്കര ചുണ്ടണ്ടാഴിക്കത്ത് വീട്ടിൽ ദിലീപ് ചന്ദ്രന്‍റെ സഹായത്തോടെ തട്ടിപ്പ്​ നടത്തുകയായിരുന്നു എന്നാണ്​ കേസ്​. ദിലീപ്​ ചന്ദ്രൻ ഫോണിലൂടെ ചോദ്യങ്ങൾക്കുള്ള ഉത്തരങ്ങൾ പറഞ്ഞുകൊടുക്കുകയായിരുന്നു. തട്ടിപ്പ്​ നടത്തിയ സമയത്ത്​ ബൈജു പൊലീസിലും ദിലീപ്​ ചന്ദ്രൻ മലപ്പുറത്ത് വിദ്യാഭ്യാസവകുപ്പിൽ ക്ലർക്കായും ജോലി ജോലിചെയ്യുകയായിരുന്നു. കൊല്ലം ക്രേവൻ സ്കൂളിലെ പരീക്ഷകേന്ദ്രത്തിൽ ഒന്നാം പ്രതി ചോദ്യ പേപ്പറിലെ ചോദ്യങ്ങൾ ഉറക്കെ വായിക്കുന്നത് കണ്ട് സംശയം തോന്നിയ പരീക്ഷക്ക്​ മേ​ൽനോട്ടം വഹിക്കുകയായിരുന്ന പി.എസ്​.സി ഉദ്യോഗസ്ഥരും ഇൻവിജിലേറ്ററും ചോദ്യം ചെയ്തതോടെയാണ്​ തട്ടിപ്പ്​ കണ്ടെത്തിയത്​. ശരീരത്തിൽ ഒട്ടിച്ചിരുന്ന മൊബൈൽ ഫോൺ പിടിച്ചെടുത്തു. പരീക്ഷ സമയത്ത്​ രാവിലെ എട്ട്​ മുതൽ 8.37 വരെയുള്ള സമയത്തിനിടക്ക്​ 34 മിനിറ്റ് ഇരുപ്രതികളും തമ്മിൽ സംസാരിച്ചത്​ ഫോണിൽ കണ്ടെത്തി. ഈ സംഭവത്തിനെ തുടർന്ന്​ പി.എസ്.സിക്ക് വീണ്ടും പരീക്ഷ നടത്തേണ്ടിവന്നു. 1,30,680 രൂപയാണ്​ ഇതിൽ നഷ്ടമുണ്ടായത്​. പി.എസ്​.സി ഉദ്യോഗസ്ഥൻ നാരായണ ശർമ, പരീക്ഷ സൂപ്രണ്ട് ആയിരുന്ന പവിഴകുമാരി എന്നിവരുൾപ്പെടെ 25 സാക്ഷികളെ പ്രോസിക്യൂഷൻ വിസ്തരിച്ചു. 56 ഓളം രേഖകൾ ഹാജരാക്കി. മൊബൈൽ ​സേവനദാതാക്കളായ ബി.എസ്.എൻ.എൽ, ഐഡിയ എന്നിവയുടെ ഉദ്യോഗസ്ഥരും കേസിൽ മൊഴി നൽകി. നിലവിൽ തിരുവനന്തപുരം പൊലീസ് ഹെഡ് ക്വാർട്ടേഴ്സ് എസ്.പിയായ ബി. കൃഷ്ണകുമാർ അന്വേഷിച്ച കേസിൽ പി.എസ്​.സി പരീക്ഷ കൺട്രോളർ ഉൾപ്പെടെ മുതിർന്ന ഉദ്യോഗസ്ഥരും മൊഴി കൊടുത്തു. പൊലീസ്​ ഉദ്യോഗസ്ഥരായ രണ്ട് സാക്ഷികൾ വിചാരണക്കിടെ കൂറുമാറി. പ്രോസിക്യൂഷൻ സാക്ഷിയായി വിസ്തരിച്ച ആലപ്പുഴയിൽനിന്നുള്ള പൊലീസ്​ റൈറ്റർ ആയ ഷിബു കൂറുമാറിയതിനെ തുടർന്ന്​ ഇയാൾക്കെതിരെ വകുപ്പ്തല അന്വേഷണം നടക്കുകയാണ്. വിചാരണ പൂർത്തിയായതിനെ തുടർന്ന് ചീഫ് ജുഡീഷ്യൽ മജിസ്​ട്രേറ്റ്​ ആയിരുന്ന പ്രസൂൺ മോഹൻ പ്രമോഷൻ നേടി പോയതിനെ തുടർന്നാണ് നിലവിലെ ചീഫ് ജുഡീഷ്യൽ മജിസ്ട്രേറ്റ് എസ്. രമേശ് കുമാർ അന്തിമ വാദം കേൾക്കുന്നത്. പ്രോസിക്യൂഷന്​ വേണ്ടി സ്​പെഷൽ പബ്ലിക്​ പ്രോസിക്യൂട്ടർ അഡ്വ. പാരിപ്പള്ളി രവീന്ദ്രൻ, അഡ്വ. ധീരജ് ജെ. ​െറാസാരിയോ, അഡ്വ. ജോയൽ ജോർജ് കമ്പിയിൽ, അഡ്വ. അർജുൻ യശ്പാൽ എന്നിവർ ഹാജരായി.