ഒാപറേഷൻ പി ഹണ്ട്​ 21.1: ജില്ലയിൽ 35 കേസ്​

കൊല്ലം: കുട്ടികളുടെ അശ്ലീല ദൃശ്യങ്ങൾ ഇൻറർനെറ്റിൽ തിരയുകയും കാണുകയും സൂക്ഷിക്കുകയും പ്രചരിപ്പിക്കുകയും ചെയ്​തവരെ കുടുക്കാൻ നടത്തിയ ഒാപറേഷൻ പി ഹണ്ടിൽ ജില്ലയിൽ 35 കേസുകൾ. കൊല്ലം സിറ്റിയിൽ 20 ഉം റൂറലിൽ 15 ഉം കേസ്​ രജിസ്​റ്റർ ചെയ്തു. ഓപറേഷൻ പി ഹണ്ട് 21.1 എന്ന പേരിൽ സംസ്ഥാന വ്യാപകമായി നടത്തിയ റെയിഡി​ൻെറ ഭാഗമായി ജില്ലയിൽ വിവിധ സ്ഥലങ്ങളിൽ പൊലീസ്​ പരിശോധന നടത്തി. സിറ്റിയിൽ ഓച്ചിറ, കരുനാഗപ്പള്ളി, ചവറ, തെക്കുംഭാഗം, അഞ്ചാലുംമൂട്, കിളികൊല്ലൂർ, ഇരവിപുരം, കൊല്ലം വെസ്​റ്റ്​, കൊട്ടിയം, ചാത്തന്നൂർ, പരവൂർ, പാരിപ്പള്ളി, കണ്ണനല്ലൂർ സ്​റ്റേഷൻ പരിധികളിൽ സൈബർ സെല്ലിൻെറ സഹായത്തോടെ 22 ഇടങ്ങളിൽ നടത്തിയ പരിശോധനകളിൽ നിരവധി ആളുകൾ പിടിയിലായി. ലാപ്​ടോപ്​, കമ്പ്യൂട്ടർ, അനുബന്ധ സാമഗ്രികൾ, മൊബൈൽ ഫോണുകൾ എന്നിവ പിടിച്ചെടുത്ത് ഫോറൻസിക്ക് പരിശോധനക്കയച്ചു. പൊതുമേഖല സ്ഥാപനത്തിലെ ജീവനക്കാരൻ, കരാർ ജീവനക്കാർ, ഐ.ടി പ്രഫഷണലുകൾ, ഉയർന്ന ബിരുദമുള്ളവർ, തൊഴിൽരഹിതർ, വിദ്യാർഥികൾ എന്നിവരാണ്​ പിടിയിലായത്. ഫോറൻസിക് ഫലത്തി​ൻെറ അടിസ്ഥാനത്തിൽ അറസ്​റ്റ്​ അടക്കം തുടർനടപടി ഉണ്ടാകും. ജില്ല പൊലീസ്​ മേധാവി ടി. നാരായണ​ൻെറ നേതൃത്വത്തിൽ, സി ബ്രാഞ്ച് എ.സി.പി, സൈബർ സെൽ സബ്​ ഇൻസ്​പെക്ടർ ഷാൻസിങ്​, എ.എസ്​.ഐമാരായ നിയാസ്​, പ്രതാപൻ, സി.പി.ഒ ജിജോ എന്നിവരും ഐ.എസ്​.എച്ച്​.ഒമാരും നേതൃത്വം നൽകി. റൂറലിൽ നാലുപേരെ അറസ്​റ്റ്​ ചെയ്തു. 17 മൊബൈൽ ഫോൺ പിടിച്ചെടുത്തു. പുനലൂർ ശാസ്താംകോണം മണി മന്ദിരത്തിൽ മഹേഷ്‌, അഞ്ചൽ വടമൺ സ്വദേശി അഷൂജ് പ്രസാദ് (24), അസം സ്വദേശി സാദിക്കുൽ ഇസ്​ലാം (20), എഴുകോൺ അനന്തു ഭവനിൽ രമേഷ് ചന്ദ്രൻ (28) എന്നിവരെയാണ്​ അറസ്​റ്റ്​ ചെയ്തത്​. അഞ്ചൽ പൊലീസ് സ്​റ്റേഷനിൽ രജിസ്​റ്റർ ചെയ്ത കേസിൽ ഒരാൾക്ക്​ പ്രായപൂർത്തിയാകാത്തതിനാൽ ജുവനൈൽ നിയമപ്രകാരം നടപടി സ്വീകരിച്ചു. 15 പൊലീസ് ഇൻസ്പെക്ടർമാരുടെയും 87 ഉദ്യോ​ഗസ്ഥരുടെയും നേതൃത്വത്തിൽ 15 ടീമുകളായി 17 കേന്ദ്രങ്ങളിലാണ്​ റെയ്​ഡ് നടത്തിയത്​. കൊല്ലം റൂറൽ ജില്ല പൊലീസ് മേധാവി കെ.ബി. രവി, അഡീഷനൽ ജില്ല പൊലീസ് മേധാവി ഇ.എസ്. ബിജുമോൻ എന്നിവർ നേതൃത്വം നൽകി.