ഫ്രിഡ്​ജിന്​ തീപിടിച്ച്​ വീടിന്​ നാശം

ചാത്തന്നൂർ: ഇടിമിന്നലിൽ വീട്ടിൽ ഷോട്ട് സർക്യൂട്ട് ഉണ്ടായി ഫ്രിഡ്ജിന്​ തീപിടിച്ച്​ വീട്​ ഭാഗികമായി നശിച്ചു. ചിറക്കര പഞ്ചായത്തിൽ നെടുങ്ങോലം ചരുവിള വീട്ടിൽ സുധർമണിയുടെ വീട്ടിലെ അടുക്കളയിലിരുന്ന ഫ്രിഡ്ജിനാണ് തീപിടിച്ചത്. ബുധനാഴ്ച വൈകീട്ട് 6.45 നാണ് സംഭവം. ഈ സമയം വീട്ടിൽ ആരുമില്ലായിരുന്നു. അടുക്കളയിൽനിന്ന്​ പുക ഉയരുന്നത് കണ്ട് അയൽവാസികളാണ് സംഭവം അഗ്​നിരക്ഷാസേനയെ അറിയിച്ചത്. ഉടൻ പരവൂർ നിലയത്തിൽനിന്ന്​ അഗ്​നിരക്ഷാസേനാംഗങ്ങൾ എത്തി തീകെടുത്തുകയായിരുന്നു. അടുക്കള ഭാഗികമായി കത്തിയമർന്നു. ഫ്രിഡ്ജിരുന്ന ഭാഗത്തെ ഭിത്തിയും പൂർണമായും തകർന്നു. അയൽവാസിയായ മാധവത്തിൽ സുദർശനന്‍റെ വീട്ടിലും നാശനഷ്ടം സംഭവിച്ചിട്ടുണ്ട്. വീട്ടിലെ ഫാനുകളും ലൈറ്റുകളും ശുചിമുറിയിലെ വൈദ്യുതീകരണവും പൂർണമായും നശിച്ചു. ചാത്തന്നൂരിൽ അപകടങ്ങൾ: ദേശീയപാതയിൽ ഗതാഗത സ്തംഭനം ചാത്തന്നൂർ: ദേശീയപാതയിൽ അപകടപരമ്പരയെ തുടർന്ന്​ മണിക്കൂറോളം ഗതാഗതം സ്​തംഭിച്ചതോടെ യാത്രക്കാർ വലഞ്ഞു. ഇന്നലെ അഞ്ചരയോടെ ചാത്തന്നൂർ ജങ്​ഷനിൽ മൂന്ന് വാഹനങ്ങൾ കൂട്ടിയിടിച്ച അപകടത്തിന്​ പിന്നാലെ ഏഴോടെ ടൂറിസ്റ്റ് ബസിൽ തടിലോറി തട്ടിയുണ്ടായ അപകടത്തെതുടർന്ന്​ ദേശീയപാതയിൽ ഒരു മണിക്കൂറോളമാണ്​ ഗതാഗതം സ്തംഭിച്ചത്​. ടൂറിസ്റ്റ് ബസിന്‍റെ സൈഡ് ഗ്ലാസിൽ തട്ടിയെന്ന് പറഞ്ഞ്​ ഡ്രൈവർ ബസ് റോഡിൽനിന്ന്​ മധ്യഭാഗത്ത്​ നിർത്തിയിടുകയായിരുന്നു. അഞ്ചു കിലോമീറ്റർ ഭാഗത്ത് വാഹനങ്ങൾ നിരന്നതോടെ ആംബുലൻസുകളും ഗതാഗത കുരുക്കിൽപെട്ടു. തുടർന്ന് ഹൈവേ പൊലീസും ചാത്തന്നൂർ പൊലീസും എത്തിയാണ് ഗതാഗതക്കുരുക്ക്‌ അഴിച്ചത്. ഈ രണ്ട് അപകടങ്ങൾ കൂടാതെ മൂന്ന് ചെറു അപകടങ്ങളും ദേശീയപാതയോരത്ത് നടന്നെങ്കിലും ആർക്കും പരിക്കില്ല.