വഴിയൊരുക്കിയാൽ എത്തും, മിനിക്കോയ്​ സർവിസ്​

കൊല്ലം: ലക്ഷദ്വീപ്​ ദ്വീപസമൂഹത്തിന്‍റെ ഭാഗമായ മിനിക്കോയിയിലേക്ക്​ കൊല്ലത്തുനിന്ന്​ കപ്പൽ സർവിസ്​ ആരംഭിക്കാനുള്ള വഴിതെളിയുന്നു. മിനിക്കോയ് യാത്ര കപ്പൽ സർവിസ് ആരംഭിക്കുന്നത് സംബന്ധിച്ച് വിശദ പരിശോധനക്ക്​ ഉന്നതതല ലക്ഷദ്വീപ്​ ഉദ്യോഗസ്ഥ സംഘം കൊല്ലം തുറമുഖം സന്ദർശിക്കും. ഇതുസംബന്ധിച്ച്​ ലക്ഷദ്വീപ് അഡ്മിനിസ്ട്രേഷൻ ഉറപ്പുനൽകിയതായി എൻ.കെ. പ്രേമചന്ദ്രൻ എം.പി അറിയിച്ചു. കൊല്ലം -മിനിക്കോയ് യാത്ര കപ്പൽ സർവിസുമായി ബന്ധപ്പെട്ട് ലക്ഷദ്വീപ് സെക്രട്ടേറിയറ്റിൽ ചേർന്ന ഉന്നതതല ഉദ്യോഗസ്ഥരുമായുള്ള ചർച്ചയിലാണ് സന്ദർശനത്തിന് തീരുമാനമായത്. മിനിക്കോയിയുമായി ഏറ്റവും അടുത്ത് കിടക്കുന്ന കൊല്ലം തുറമുഖത്തുനിന്ന്​ യാത്രാക്കപ്പൽ സർവിസുകൾ ആരംഭിക്കുന്നതിന്‍റെ ഗുണഫലങ്ങളെക്കുറിച്ച്​ എം.പി വിശദീകരിച്ചു. കപ്പൽ സർവിസ് ലക്ഷദ്വീപിന് ഗുണകരമായതിനാൽ വളരെ അനുഭാവപൂർവമായ നിലപാടാണ് ലക്ഷദ്വീപ് അഡ്മിനിസ്ട്രേഷൻ സ്വീകരിച്ചത്. എൻ.കെ. പ്രേമചന്ദ്രൻ എം.പി ആവശ്യപ്പെട്ടതിനെ തുടർന്നാണ് യാത്ര കപ്പൽ സർവിസ് സംബന്ധിച്ച ചർച്ച നടന്നത്. അനുകൂല സാഹചര്യം പരിഗണിച്ച്​ സംസ്ഥാന സർക്കാർ കൂടുതൽ കാര്യക്ഷമമായി വിഷയത്തിൽ ഇടപെടണമെന്നും കേരള സ്റ്റേറ്റ് ഇൻലാൻഡ് നാവിഗേഷൻ കോർപറേഷൻ മുൻകൈയെടുത്ത്​ പ്രവർത്തങ്ങൾ നടത്തണമെന്നും എം.പി ആവശ്യപ്പെട്ടു. ഉന്നതതലയോഗത്തിൽ ലക്ഷദ്വീപ് അഡ്മിനിസ്ട്രേറ്ററുടെ ഉപദേശകൻ അൻമ്പരസു, ധനകാര്യ വകുപ്പ് സെക്രട്ടറി അമിത് സാതിജ, കലക്ടർ അസ്കർ അലി, യു.ടി അഡ്മിനിസ്ട്രേഷൻ സെക്രട്ടറി ശശാങ്ക് മണി ത്രിപതി, ഷിപ്പിങ് മന്ത്രാലയത്തിന്‍റെ പ്രതിനിധികൾ എന്നിവർ പങ്കെടുത്തു.