കണി​കണ്ടുണരാൻ കുഞ്ഞൻ കണിക്കൊന്ന

കുന്നിക്കോട്: കാഴ്ചക്ക്​ കൗതുകമുണർത്തി കർണികാരങ്ങളെ 'മിനിമൈസ്' ചെയ്ത് വളർത്തുകയാണ് ആവണീശ്വരം സ്വദേശിയായ ബാലചന്ദ്രൻ. കുന്നിക്കോട് ആവണീശ്വരം പുഴയോരം ഗാര്‍ഡനില്‍ കെ. ബാലചന്ദ്രന്‍റെ വീട്ടുമുറ്റത്ത് ഇത്തവണ പീതവര്‍ണവിസ്മയം ഒരുക്കി ബോണ്‍സായി കണിക്കൊന്ന പൂത്തു. എട്ട് വർഷം മുമ്പ് ചെടിച്ചട്ടിയിൽ വളർത്തിത്തുടങ്ങിയ കൊന്ന കഴിഞ്ഞ വർഷമാണ്​ പൂവിട്ട​ത്​. കൃത്യമായി ജൈവവളവും സംരക്ഷണവും ഒരുക്കി പരിപാലിച്ചതോടെതാണ് മൂന്നടി പൊക്കമുള്ള കൊന്നയിൽ പൂവിടർന്നത്​. വ്യത്യസ്ത തരം ആല്‍മരവും പാലയും ഫലവൃക്ഷങ്ങളുമെല്ലാം ഇവിടെ ബോൺസായി മരങ്ങളായി ഉണ്ട്. അധ്യാപികയായിരുന്ന ഭാര്യ ഗീതാകുമാരിയും മക്കളായ കൃഷ്ണേന്ദുവും പൗർണമിയും ചെടി പരിപാലനത്തിന്​ ഒപ്പമുണ്ട്.