കടലാക്രമണം തടയാന്‍ പാറ നല്‍കണം - കലക്ടര്‍

കൊല്ലം: ജില്ലയില്‍ പാറഖനനത്തിന് അനുമതിയുള്ള എല്ലാ ലൈസന്‍സികളും ഖനനം ചെയ്‌തെടുക്കുന്ന പാറയുടെ 50 ശതമാനം വ്യാപ്തം നിര്‍ദിഷ്ട വലിപ്പത്തില്‍ പൊട്ടിച്ച് കടലാക്രമണ ഭീഷണി തടയുന്നതിനുള്ള പ്രവര്‍ത്തനങ്ങള്‍ക്ക് വിട്ടുനല്‍കണമെന്ന് ജില്ല ദുരന്ത നിവാരണ അതോറിറ്റി ചെയര്‍പേഴ്‌സണ്‍ കൂടിയായ കലക്ടര്‍ അഫ്‌സാന പര്‍വീണ്‍ ഉത്തരവിട്ടു. ഇറിഗേഷന്‍/ഹാര്‍ബര്‍ എൻജിനീയറിങ് എക്‌സിക്യൂട്ടിവ് എൻജിനിയര്‍ കരാറുകാരെ നിര്‍ദേശിക്കും. പാറയുടെ വലിപ്പം, ഭാരം, അളവ് എന്നിവയുടെ പട്ടിക ഇറിഗേഷന്‍-ഹാര്‍ബര്‍ എൻജിനീയറിങ് എക്‌സിക്യൂട്ടിവ് എൻജിനിയര്‍ ജിയോളജിസ്റ്റിന് മുന്‍കൂറായി കൈമാറണം. ലഭിക്കുന്ന പാറ കടലാക്രമണ ഭീഷണി തടയുന്നതിന് മാത്രമാണ് ഉപയോഗിക്കുന്നതെന്നും ഉറപ്പുവരുത്തണമെന്നും കലക്ടര്‍ നിര്‍ദേശിച്ചു.