കാര്‍ തോട്ടിലേക്ക് മറിഞ്ഞ്​ ദമ്പതികൾക്ക്​ പരിക്ക്

പത്തനാപുരം : പിടവൂർ പട്ടാഴി പാതയിൽ കാർ തോട്ടിലേക്ക് മറിഞ്ഞു. ദമ്പതിമാർക്ക്​ പരിക്കേറ്റു. പിടവൂർ സത്യൻ മുക്ക് മംഗലശ്ശേരി വീട്ടിൽ അനീഷ്, ഭാര്യ ശ്രീദേവി എന്നിവർക്കാണ് പരിക്കേറ്റത്. പട്ടാഴിയിലെ കുടുംബ വീട്ടിലെത്തി മടങ്ങുമ്പോഴായിരുന്നു അപകടം. പാതയുടെ ഈ ഭാഗത്ത് വീതിയില്ലാത്ത കലുങ്കുകളാണുള്ളത്. ഇതിനുപുറമെ വശങ്ങളിൽ സംരക്ഷണഭിത്തിയും നിർമിച്ചിട്ടില്ല. ദിവസേന ഇവിടെ വാഹനങ്ങൾ അപകടത്തിൽപ്പെടുന്നതായി പ്രദേശവാസികൾ പറയുന്നു. പരിക്കേറ്റവരെ കൊട്ടാരക്കരയിലെ സ്വകാര്യ ആശുപത്രിയിൽ പ്രവേശിപ്പിച്ചു.