ഇന്ധന വില വർധന: ശവമഞ്ചമേന്തി കോൺഗ്രസ്​ പ്രതിഷേധം

കൊല്ലം: അനിയന്ത്രിതമായി തുടരുന്ന ഇന്ധന, പാചകവാതക വില വർധനക്കെതിരെ 'വിലക്കയറ്റമില്ലാത്ത ഇന്ത്യ' മുദ്രാവാക്യമുയർത്തി രാജ്യവ്യാപകമായി നടത്തുന്ന പ്രതിഷേധങ്ങളുടെ ഭാഗമായി ഗ്യാസ്​ സിലിണ്ടറിന്‍റെ ശവമഞ്ചമേന്തിയും ഓട്ടോറിക്ഷ കെട്ടിവലിച്ചും​ പ്രകടനവുമായി കോൺഗ്രസ്​. ഡി.സി.സിയു​ടെ നേതൃത്വത്തിൽ തിങ്കളാഴ്ച രാവിലെ കൊല്ലം കെ.എസ്​.ആർ.ടി.സി സ്റ്റാൻഡ്​ ജങ്​ഷനിൽനിന്ന് ആരംഭിച്ച പ്രതി​ഷേധ മാർച്ച്​ ചിന്നക്കട ഹെഡ്​ പോസ്റ്റ്​ ഓഫിസിന്​ മുന്നിൽ സമാപിച്ചു. തുടർന്ന്​ നടന്ന ധർണ കെ.പി.സി.സി അച്ചടക്ക സമിതി അധ്യക്ഷൻ തിരുവഞ്ചൂർ രാധാകൃഷ്ണൻ ഉദ്​ഘാടനം ചെയ്തു. സാധാരണക്കാരുടെ ജീവിതം വഴിമുട്ടിച്ച്​ പ്രവചനാതീതവും അനിയന്ത്രിതവുമായി ഇന്ധനവില കുതിക്കുമ്പോൾ ഒന്നും സംഭവിക്കാത്ത രീതിയിൽ മോദി സർക്കാർ മുന്നോട്ട്​ പോകുകയാണെന്ന്​ തിരുവഞ്ചൂർ പറഞ്ഞു. വലിയ വിപ്ലവം ഉണ്ടാകേണ്ട സാഹചര്യത്തിലേക്കാണ്​ നാട്​ നീങ്ങുന്നത്​. ഇന്ധന വില കൂടുന്നതിലൂടെ ലഭിക്കുന്ന അധിക നികുതി കുറക്കാൻ സംസ്ഥാന സർക്കാർ ആലോചിക്കുന്നത്​ പോലുമില്ല. ഈ വിഷയത്തിൽ ഇരുസർക്കാറുകൾക്കും ഒരേ ഭാഷയും ശൈലിയുമാണെന്നും ജനം സംഘടിതമായി തെരുവിലിറങ്ങാതെ മറ്റ്​ മാർഗമില്ലെന്നും അദേഹം പറഞ്ഞു. ഡി.സി.സി പ്രസിഡന്‍റ്​ രാജേന്ദ്ര പ്രസാദ്​ അധ്യക്ഷതവഹിച്ചു. പി.സി. വിഷ്​ണുനാഥ്​ എം.എൽ.എ, യു.ഡി.എഫ്​ ജില്ല ചെയർമാൻ കെ.സി. രാജൻ, ശൂരനാട്​ രാജശേഖരൻ, എ. ഷാനവാസ്​ ഖാൻ, എസ്​. വിപിനചന്ദ്രൻ, ബിന്ദു കൃഷ്ണ, എൻ. അഴകേശൻ, എഴുകോൺ നാരായണൻ, പി. ജർമിയാസ്​, സൂരജ് രവി, കെ. ബേബിസൺ, തൊടിയൂർ രാമചന്ദ്രൻ, എൽ.കെ. ശ്രീദേവി, നടുക്കുന്നിൽ വിജയൻ, നജീം മണ്ണേൽ എന്നിവർ സംസാരിച്ചു.