കാട്ടാനകൾ റെയിൽവേ ലൈനിലും ഭീഷണിയായി

പുനലൂർ: കിഴക്കൻ മലയോരത്ത് കാടിറങ്ങുന്ന കാട്ടാനകൾ റെയിൽവേ ലൈനിലും ഭീതി പടർത്തുന്നു. കഴിഞ്ഞ രണ്ടു ദിവസമായി കഴുതുരുട്ടി എൽ.പി.എസിന് സമീപത്ത് റെയിൽവേ ലൈനിനോട് ചേർന്ന് ആനയുടെ ശല്യമുണ്ടായി. പരിസരത്തെ കൃഷികൾ നശിപ്പിച്ച ശേഷം റെയിൽവേ ലൈനിലും ആന നാശം വരുത്താൻ ശ്രമിച്ചു. പരിസരവാസികൾ വിരട്ടിയോടിച്ചതിനാൽ വലിയ നാശങ്ങൾ ഒഴിവായി. പാളത്തിലും പരിസരത്തും ആനകളെ കണ്ടതിനാൽ ട്രെയിൻ വേഗം കുറച്ചാണ് കടന്നുപോയത്. രാത്രിയിലുള്ള പാലരുവി എക്സ്​പ്രസ് പാളത്തോട് ചേർന്നുണ്ടായിരുന്ന ആനക്കൂട്ടത്തെ തട്ടിയതോടെയാണ് ഇവ കാടുകയറിയത്. ശനിയാഴ്ച രാത്രിയിലും ഈ ഭാഗത്ത് ആനയുടെ ശല്യമുണ്ടായിരുന്നതായി പരിസരവാസികൾ പറഞ്ഞു.