കെ-റെയിൽ: സർക്കാർ വിവേകപൂർണമായ തീരുമാനമെടുക്കണം-വിഷ്ണുനാഥ്

കൊട്ടിയം: കെ-റെയിൽ വിഷയത്തിൽ വിവേകപൂർണമായ തീരുമാനമെടുക്കാൻ സർക്കാർ തയാറാകണമെന്ന് പി.സി. വിഷ്ണുനാഥ് എം.എൽ.എ ആവശ്യപ്പെട്ടു. തഴുത്തല വഞ്ചിമുക്കിൽ നടന്ന കെ-റെയിൽ വിരുദ്ധ സമരത്തിൽ പങ്കെടുത്ത്​ സംസാരിക്കുകയായിരുന്നു അദ്ദേഹം. നിയമവിരുദ്ധമായി ജനങ്ങളുടെ മേൽ ഭരണകൂട ഭീകരത അടിച്ചേൽപിക്കാൻ ശ്രമിക്കരുത്. ഭരണകൂടത്തിന്‍റെ മുഷ്​ക്കും വാശിയും ജനങ്ങളുടെ മേൽ അടിച്ചേൽപ്പിക്കാൻ ശ്രമിക്കുകയാണ്. ജനങ്ങൾക്ക് ആവശ്യമില്ലാത്ത പദ്ധതിയാണെന്ന തിരിച്ചറിവ് സർക്കാറിന് ഉണ്ടാകണം. ജനങ്ങളുടെ പ്രതിഷേധം മാനിക്കാൻ സർക്കാർ തയാറാകണമെന്നും പദ്ധതിയിൽ നിന്ന്​ സർക്കാർ പിന്മാറണമെന്നും അദ്ദേഹം ആവശ്യപ്പെട്ടു. ആദിച്ചനല്ലൂർ പഞ്ചായത്ത് പ്രസിഡന്‍റ്​ ഷീല ബിനു, മുൻ ഡി.സി.സി പ്രസിഡന്‍റ്​​ ബിന്ദു കൃഷ്ണ, ഡി.സി.സി വൈസ്​ പ്രസിഡന്‍റ്​​ വിപിനചന്ദ്രൻ, കോൺഗ്രസ് ബ്ലോക്ക് പ്രസിഡന്‍റ്​ നാസിമുദീൻ ലബ്ബ, തൃക്കോവിൽവട്ടം പഞ്ചായത്ത് അംഗങ്ങളായ വസന്താ ബാലചന്ദ്രൻ, മോനിഷ, കണ്ണനല്ലൂർ സമദ്, ഷെമീർ ഖാൻ, സജീവ് താഴത്തുവിള, സജുദാസ്, വൈസ് പ്രസിഡന്‍റ്​ സാജൻ, പഞ്ചായത്ത് അംഗം ദീപ്തി, ബി.ജെ.പി നേതാക്കളായ പ്രവീൺ, കൊട്ടിയം സുനിൽകുമാർ, രൻജിത്ത്, സുരേന്ദ്രനാഥ്, ബൈജു പുതുച്ചിറ, കെ-റെയിൽ വിരുദ്ധജനകീയ സമിതി നേതാക്കളായ ഷൈല കെ. ജോൺ, വിജയകൃഷ്ണൻ തുടങ്ങിയവർ പ്രതിഷേധത്തിന് നേതൃത്വം നൽകി. പ്രതിഷേധ കഞ്ഞി കുടിച്ച് പിറന്നാൾ കൊട്ടിയം: പ്രതിഷേധ കഞ്ഞി കുടിച്ച് എം.എൽ.എയുടെ പിറന്നാൾ ആഘോഷം. പി.സി. വിഷ്ണുനാഥ് എം.എൽ.എയാണ് കെ-റെയിലിനെതിരെ സമരം ചെയുന്ന സ്ത്രീകൾ ​െവച്ചുനൽകിയ പ്രതിഷേധകഞ്ഞി കുടിച്ച് തന്‍റെ നാൽപത്തിനാലാം പിറന്നാൾ ആഘോഷിച്ചത്. രാവിലെ നിയമസഭ കമ്മിറ്റിക്കായി പുറപ്പെട്ടപ്പോഴാണ് കെ-റെയിലിനെതിരെ തഴുത്തല വഞ്ചിമുക്കിൽ പ്രതിഷേധം നടക്കുന്ന വിവരം അറിഞ്ഞത്. തുടർന്ന്​ സ്ഥലത്തെത്തുകയായിരുന്നു.