വീടുംപപരിസരവും വൃത്തിയാക്കാം

കൊല്ലം: ശുചിത്വ, ഭവന പദ്ധതികൾക്ക്​ പ്രധാന്യം നൽകി കോർപറേഷൻ ബജറ്റ്​. നഗരത്തെ ലോകോത്തര നിലവാരത്തിലേക്കുയർത്താനുള്ള ലക്ഷ്യത്തി​‍ൻെറ ചുവടുപിടിച്ചുള്ള ബജറ്റ്,​ എല്ലാ ഡിവിഷനുകളിലെയും സ്വപ്​നപദ്ധതികൾ യാഥാർഥ്യമാക്കുമെന്ന പ്രഖ്യാപനവുമായാണ്​ ഡെപ്യൂട്ടി മേയർ കൊല്ലം മധു അവതരിപ്പിച്ചത്​. ഭരണസമിതിയുടെ രണ്ടാം ബജറ്റ്​ അവതരണ കൗൺസിലിൽ മേയർ പ്രസന്ന ഏണസ്റ്റ്​ അധ്യക്ഷത വഹിച്ചു. 146.76 കോടി രൂപ മുൻ ബാക്കിയിരിപ്പുള്ള ബജറ്റിൽ 1292.81 കോടി രൂപ വരവും 1193.41 കോടി രൂപ ചെലവും 99.40​ കോടി രൂപ മിച്ചവുമാണ്​ പ്രതീക്ഷിക്കുന്നത്​. ശുചിത്വം, ഭവനം, തൊഴിലുറപ്പ്​, ടൂറിസം, കുളിവെള്ളം, തെരുവുവിളക്ക്​ എന്നീ മേഖലകൾ പദ്ധതി വിഹിതത്തി‍ൻെറ വലിയൊരു പങ്കും വീതിച്ചെടുത്തപ്പോൾ നഗരവാസികളുടെ ഏറെനാളത്തെ സ്വപ്​നമായ മൊബിലിറ്റി ഹബ്ബ്​ യാഥാർഥ്യമാക്കാനുള്ള ചെറുതല്ലാത്ത നീക്കിയിരിപ്പും ബജറ്റിലുണ്ട്​. നഗരത്തെ ആരോഗ്യ സമ്പൂർണ ശുചിത്വ നഗരമാക്കുക എന്ന ഇടതുഭരണ സമിതിയുടെ പ്രഖ്യാപിത ലക്ഷ്യത്തിലേക്ക് എത്തുന്നതിന് വിവിധ പദ്ധതികളിലായി​ 55 കോടിയാണ്​ മാറ്റിവെച്ചിരിക്കുന്നത്​. കൂടുതൽ തുക വകയിരുത്തിയിരിക്കുന്നത്​ ഭവന നിർമാണത്തിനാണ്​. 50.40 കോടിയുടെ ഭവന നിർമാണമാണ്​ ലക്ഷ്യമിടുന്നത്​. കഴിഞ്ഞതവണ ​പ്രവൃത്തി പൂർത്തീകരണ മികവിന്​ കോർപറേഷന്​ പുരസ്കാരം നേടിക്കൊടുത്ത അയ്യങ്കാളി നഗര തൊഴിലുറപ്പ്​ പദ്ധതിക്ക്​ ഇത്തവണയും 40.01 കോടിയാണ്​ അനുവദിച്ചത്​. നിലവിൽ ലോറി സ്റ്റാൻഡ്​ പ്രവർത്തിക്കുന്ന സ്ഥലത്ത്​ നിർമിക്കാനുദ്ദേശിക്കുന്ന മൊബിലിറ്റി ഹബ്ബിന്​ 30 കോടിയാണ് ​വിഹിതം​. ടൂറിസം മേഖലക്ക്​ 23.38 കോടിയും ജനറൽ വിഭാഗത്തിന്​ കുളിവെള്ള കണക്ഷൻ നൽകുന്നതിന്​ 12.40 കോടിയും നൽകുമ്പോൾ, സ്ഥിരം തലവേദനയായ തെരുവുവിളക്ക്​ പ്രശ്നപരിഹാരത്തിന്​ 25 കോടിയും വകയിരുത്തിയിട്ടുണ്ട്​. അഷ്ടമുടിക്കായൽ ഉൾപ്പെടെ ജലാശയങ്ങളുടെ സംരക്ഷണത്തിനും പ്രധാന്യം നൽകുന്നതാണ്​ ബജറ്റ്​. ........................................... ശുചിത്വമാണ്​ ലക്ഷ്യം കോർപറേഷൻ ബജറ്റിൽ നഗരത്തി‍ൻെറ ശുചിത്വപാലനത്തിനായി മുന്തിയ പരിഗണന നൽകിയപ്പോൾ അഭിമാന പദ്ധതിയായ കുരീപ്പുഴ എസ്.ടി.പി സീവേജ് ട്രീറ്റ്മെന്‍റ്​ പ്ലാന്‍റിന്​ നൽകിയത്​ 31.92 കോടി. ഇതുകൂടാതെ, ഹരിത കർമ സേനയുടെ പ്രവർത്തനത്തിന്​ ഗതിവേഗം നൽകി നഗര ശുചിത്വം മികവുറ്റതാക്കാൻ 13.72 കോടിയും മാറ്റിവെച്ചു. കൂടാതെ സെപ്​റ്റേജ്​ ട്രീറ്റ്​മെന്‍റ്​ പ്ലാന്‍റ്​ സ്ഥാപിക്കുന്നതിന്​ 8.44 കോടിയും നൽകും. നഗര ശുചീകരണത്തിന്​ ആധുനിക സ്വീപ്പിങ്​ മെഷീൻ വാങ്ങാൻ 70 ലക്ഷവും മാറ്റിവെച്ചു. വീടുകളിൽ ബയോഗ്യാസ് പ്ലാന്‍റ്​ സ്ഥാപിച്ച് ഉറവിടമാലിന്യ നിർമാർജനവും ഇന്ധനലഭ്യതയും ഉറപ്പുവരുത്തുന്നതിന്​ 1.02 കോടി രൂപ നൽകും. ............................. വീടെന്ന സ്വപ്നം ലൈഫ്​ പദ്ധതിയിൽ അർഹരായ നഗരവാസികൾക്ക് വീടൊരുക്കാൻ​ 50,40,00,000 രൂപയാണ്​ വകയിരുത്തിയത്​. ഈ വർഷം പുതിയതായി 1001 വീടുകൾക്ക്​ അംഗീകാരം ലഭിച്ചതിൽ 126 എണ്ണത്തിൽ കരാറായതായി ബജറ്റ്​ വ്യക്തമാക്കുന്നു. ലൈഫിൽ ഉൾപ്പെടുത്തി 192 പേർക്ക് അംഗീകാരത്തിനായി സർക്കാർ പരിഗണനക്ക്​ വിട്ടിട്ടുണ്ട്​. ................... ഈ മനോഹര തീരം കൊല്ലം കാണാനെത്തുന്നവരെ പഴഞ്ചൊല്ല്​ അന്വർഥമാക്കി ഈ നാടിനോട്​ കൂടുതൽ അടുപ്പിക്കാന​ുള്ള വിവിധ പദ്ധതികളും ബജറ്റിൽ മുന്നോട്ടുവെച്ചിട്ടുണ്ട്​. കോർപറേഷൻ മേഖലയിലെ ചരിത്രപ്രാധാന്യമുള്ള സ്ഥലങ്ങളേയും സ്ഥാപനങ്ങളേയും പ്രകൃതിരമണീയമായ ഇടങ്ങളെയും സാംസ്കാരിക പൈതൃകം നഷ്ടമാകാത്ത രീതിയിൽ സംരക്ഷിച്ച് ടൂറിസം കേന്ദ്രങ്ങൾ ഒരുക്കും. ചിന്നക്കട ക്ലോക്ക്ടവർ കേന്ദ്രത്തിൽ നിന്നും 'ടൂർ പ്രോഗ്രാം' തയാറാക്കി 55 ഡിവിഷനുകളേയും ബന്ധിപ്പിക്കുന്ന ടൂറിസം പദ്ധതിക്ക്​ 23.38​ കോടിയാണ്​ വകയിരുത്തിയത്​. ഹൈദരാബാദ്​ ടാങ്ക്​ റോഡ്​ മാതൃകയിൽ സ്റ്റാച്യു പാർക്കിന്​ രണ്ട്​ കോടിയുമുണ്ട്​. കൂടാതെ 'തീരം മനോഹരം' പദ്ധതിയിൽ കൊല്ലം ബീച്ച്​ മുതൽ തങ്കശ്ശേരി വരെ നടപ്പാത, നടപ്പാത, ലാൻഡ്​ സ്​കേപ്പിങ്​ എന്നിവ ഒരുക്കാൻ രണ്ട്​ കോടിയും വിനിയോഗിക്കും. ........................... ജീവനാണ് അഷ്ടമുടി ഈ ഭരണസമിതി മാസങ്ങൾക്ക്​ മുമ്പ്​ തുടക്കം കുറിച്ച അഷ്ടമുടിക്കായൽ സംരക്ഷണ പ്രവർത്തനങ്ങൾക്ക്​ മുന്നോട്ടുള്ള പ്രവർത്തനങ്ങൾക്കും മേഖലയിലെ മറ്റ്​ ജലാശയങ്ങളുടെ സംരക്ഷണത്തിനും തുക വകയിരുത്തിയിട്ടുണ്ട്​. അഷ്ടമുടിക്കായലിനായി 5.45 കോടി വകയിരുത്തി. ഒപ്പം 55 ഡിവിഷനുകളിലേയും വിവിധ കുളങ്ങളുടെ നവീകരണത്തിന് 3.69 കോടിയും കൊല്ലം തോട്​ മുതൽ അഷ്ടമുടിക്കായലി‍ൻെറ മൗത്ത് വരെ ഇരുവശങ്ങളിലും പാർശ്വഭിത്തി നിർമാണവും സൗന്ദര്യവത്​കരണത്തിനുമായി 1.50 കോടിയുമുണ്ട്​. *അഷ്ടമുടി തീരത്തെ കടവുകൾ സംരക്ഷിച്ച് സൗന്ദര്യവത്​കരണത്തിന് ഒരു കോടി * വട്ടക്കായൽ, കട്ടക്കായൽ പാർശ്വഭിത്തി നിർമാണം ഒരുകോടി * ആശ്രാമം അഷ്ടമുടി തീരത്ത് സൈഡ്​ വാൾ കെട്ടി സൗന്ദര്യവത്​കരണത്തിന് 75 ലക്ഷം *കുരീപ്പുഴ-വടക്കേച്ചിറ-തെക്കേച്ചിറ ജലാശയങ്ങൾ സംരക്ഷിക്കാൻ 25 ലക്ഷം * തണ്ണീർത്തടങ്ങളുടെ സംരക്ഷണവും വികസനവും -'ഇനി ഞാൻ ഒഴുകട്ടെ' പദ്ധതിക്ക്​ 25 ലക്ഷം