ഇനി പരീക്ഷച്ചൂട്​

​കൊല്ലം: കോവിഡ്​ കാല ഇടവേളക്കശേഷം കൊല്ല പരീക്ഷ സ്​കൂളുകളിൽ മടങ്ങിയെത്തി. ഇന്നുമുതൽ ഒന്നുമുതൽ ഒമ്പത്​ വരെ ക്ലാസുകളിലെ വിദ്യാർഥികൾ വർഷാവസാന പരീക്ഷച്ചൂടിലേക്ക്​ കടക്കുകയാണ്​. എൽ.പി തലത്തിൽ ഒന്നുമുതൽ നാല്​ വരെ ക്ലാസുകളിൽ വർക്​ഷീറ്റ്​ ഉപയോഗിച്ചാണ്​ കുട്ടികളുടെ മികവളക്കുന്നത്​. യു.പി, എച്ച്​.എസ്​ ക്ലാസുകളിൽ ചോദ്യപേപ്പർ നൽകിയുള്ള വാർഷിക ​പരീക്ഷ സാധാരണ ഗതിയിൽ നടക്കും. ചൊവ്വാഴ്ചയോടെ എല്ലാ സ്കൂളുകളിലും ചോദ്യപേപ്പറുകൾ എത്തിച്ചു. ഒരുക്കങ്ങളും പൂർത്തിയായി. കോവിഡ്​ നിയന്ത്രണങ്ങൾ പ്രത്യേകിച്ച്​ നിലവിലില്ലെങ്കിലും ഒരു ബെഞ്ചിൽ രണ്ട്​-മൂന്ന്​ കുട്ടികൾ വരെയായിരിക്കും പരീക്ഷക്ക്​ ഇരിക്കുക. കോവിഡ്​ രോഗബാധിതർക്കും പരീക്ഷക്ക്​ എത്താം. ഇവർക്കായി പ്രത്യേകം മുറി ഒരുക്കും. 2020ൽ വാർഷികപരീക്ഷ നടക്കുന്നതിനിടയിലാണ്​ കോവിഡ്​ ലോക്​ഡൗൺ എത്തിയത്​. കഴിഞ്ഞവർഷം പരീക്ഷ ഉണ്ടായില്ല. ഇത്തവണ ക്ലാസുകൾ സാധാരണ നിലയിലായതോടെയാണ്​ പരീക്ഷയും തിരിച്ചെത്തിയത്​. മാർച്ച്​ 31ന്​ തുടങ്ങുന്ന എസ്​.എസ്​.എൽ.സി പരീക്ഷക്ക്​ മുന്നോടിയായി മോഡൽ പരീക്ഷകൾ തിങ്കളാഴ്ച പൂർത്തിയായിരുന്നു. എസ്​.എസ്​.എൽ.സി പരീക്ഷയുടെ ചോദ്യപേപ്പറുകൾ ജില്ലയിൽ എത്തിക്കഴിഞ്ഞു. അടുത്ത ദിവസങ്ങളിൽ ചോദ്യപേപ്പർ തരംതിരിക്കൽ നടക്കും. പത്താം ക്ലാസ്​ പരീക്ഷയുടെ ആദ്യ ദിവസങ്ങളിലും രാവിലെ മറ്റ്​ ക്ലാസുകളിലെ പരീക്ഷ നടക്കും. തുടർന്ന്​ ഏപ്രിൽ രണ്ടിന്​ അവസാന പരീക്ഷയോടെ ഒന്ന്​ മുതൽ ഒമ്പത്​ വരെ ക്ലാസുകാരുടെ അധ്യയന വർഷത്തിന്​ അവസാനമാകും.