ഇടമുളയ്ക്കലിൽ സത്യസായി ഗ്രാമം മെഗാ ടൗൺഷിപ്

കൊല്ലം: ഇടമുളയ്ക്കൽ പഞ്ചായത്തിൽ രാജീവ് ഗാന്ധി ദശലക്ഷം പാർപ്പിട പദ്ധതിയുടെ ഭാഗമായി നിർമിച്ച വീടുകൾ വാസയോഗ്യമല്ലാതായതിനാൽ പകരം വീട്​ നിർമിച്ച്​ നൽകാൻ കെ.ചിറ്റിലപ്പിള്ളി ഫൗണ്ടേഷനും ശ്രീ സത്യസായി ഓർഫനേജ് ട്രസ്റ്റ് കേരള ഘടകവും കൈകോർക്കുന്നു. സത്യസായിഗ്രാമം മെഗാ ടൗൺഷിപ് എന്ന പേരിലുള്ള ഭവനനിർമാണ പദ്ധതിയുടെ ശിലാസ്ഥാപനം 25ന്​ രാവിലെ 10ന്​ പി.എസ്. സുപാൽ എം.എൽ.എ നിർവഹിക്കുമെന്ന്​ ഭാരവാഹികൾ വാർത്തസമ്മേളനത്തിൽ അറിയിച്ചു. കെ. ചിറ്റിലപ്പിള്ളി ഫൗണ്ടേഷൻ ചെയർമാൻ കൊച്ചൗസേപ്പ് ചിറ്റിലപ്പിള്ളി, ശ്രീ സത്യസായി ഓർഫനേജ് ട്രസ്റ്റ് -കേരളയുടെ ചെയർപേഴ്സൺ ജസ്റ്റിസ് എ. ലക്ഷ്മിക്കുട്ടി എന്നിവർ ശിലാസ്ഥാപനചടങ്ങിൽ പ​ങ്കെടുക്കും. 30 വർഷങ്ങൾക്ക് മുമ്പ്​ നിർമിച്ച 51 വീടുകളാണ്​ തകർച്ചയിലായത്​. വാർഡ്​ അംഗം വി.എസ്​. റാണ ശ്രദ്ധയിൽപെടുത്തിയതോടെയാണ്​ ട്രസ്റ്റ്​ പദ്ധതി ഏറ്റെടുത്തത്​. പട്ടയവും കൈവശരേഖയുമുള്ള 21 ഗുണഭോക്താക്കൾക്കാണ് ആദ്യഘട്ടത്തിൽ 60 ലക്ഷം ചെലവിൽ വീട്​ നിർമിക്കുന്നത്​. വെള്ളൂർ വാർഡിലെ പണി പൂർത്തിയാകാത്ത മറ്റ് വീടുകളും താമസയോഗ്യമാക്കും. ട്രസ്റ്റ്​ ഫൗണ്ടർ ആൻഡ്​ എക്സിക്യൂട്ടിവ് ഡയറക്ടർ കെ.എൻ. ആനന്ദകുമാർ, ട്രസ്റ്റ് കൊല്ലം ജില്ല പ്രസിഡന്‍റ്​ നാരായണ സ്വാമി, ട്രസ്റ്റ് കൊല്ലം ജില്ല സെക്രട്ടറി സി.കെ. രവി, വി.എസ്​. റാണ എന്നിവർ വാർത്ത​സമ്മേളനത്തിൽ പ​ങ്കെടുത്തു.