വിസ്മയ കേസ്: പ്രോസിക്യൂഷൻ സാക്ഷിവിസ്താരം പൂർത്തിയായി

കൊല്ലം: വിസ്മയ കേസിൽ പ്രോസിക്യൂഷൻ ഭാഗം സാക്ഷിവിസ്താരം കൊല്ലം ഒന്നാം അഡീഷനൽ സെഷൻസ് ജഡ്ജി കെ.എൻ. സുജിത് മുമ്പാകെ പൂർത്തിയായി. 25ന് പ്രതിയിൽനിന്ന് വിശദീകരണം തേടും. 2020 മേയ് 30ന് ബി.എ.എം.എസ് വിദ്യാർഥിനിയായിരുന്ന വിസ്മയയെ ​മോട്ടോർ വാഹനവകുപ്പിൽ എ.എം.വി.ഐ ആയിരുന്ന ഭർത്താവ്​ കിരൺകുമാർ ശാരീരികമായും മാനസികമായും പീഡിപ്പിച്ചതിനെ തുടർന്ന് 2021 ജൂൺ 21ന് ഭർതൃഗൃഹത്തിൽ ആത്മഹത്യ ചെയ്തുവെന്നാണ്​ കേസ്​. സ്ത്രീധനമരണം, സ്ത്രീധന പീഡനം, ആത്മഹത്യ പ്രേരണ, പരിക്കേൽപിക്കൽ, ഭീഷണിപ്പെടുത്തൽ, സ്ത്രീധനം ആവശ്യപ്പെടൽ എന്നീ കുറ്റകൃത്യങ്ങളാണ്​ ചുമത്തിയത്​. പ്രോസിക്യൂഷ‍​ൻെറ ഭാഗത്തുനിന്ന് 41 സാക്ഷികളെ വിസ്തരിച്ചു. കിരൺ കുമാറി‍ൻെറ പിതാവ് സദാശിവൻപിള്ള, സഹോദരി കീർത്തി, ഭർത്താവ് മുകേഷ് എം. നായർ, സഹോദരപുത്രൻ അനിൽകുമാർ, ഭാര്യ ബിന്ദുകുമാരി എന്നീ സാക്ഷികൾ വിസ്താരത്തിനിടെ കൂറുമാറി. സ്​പെഷൽ പബ്ലിക് പ്രോസിക്യൂട്ടർ ജി. മോഹൻരാജ് അവരെ എതിർവിസ്താരം നടത്തി. സൈബർ പരിശോധനയിൽ കിരൺകുമാറി‍ൻെറ ഫോണിൽ റെക്കോഡ് ചെയ്​ത സംഭാഷണങ്ങൾ കണ്ടെത്തി. സ്ത്രീധനം സംബന്ധിച്ചതുൾപ്പെടെ വിസ്മയയുമായി നടത്തിയ സംഭാഷണങ്ങൾ കോടതിയിൽ തെളിവായി ഹാജരാക്കി. പ്രോസിക്യൂഷനു വേണ്ടി സ്​പെഷൽ പബ്ലിക് പ്രോസിക്യൂട്ടർ ജി. മോഹൻരാജ്​ ഹാജരായി.