പുതിയകാവ്-ചക്കുവള്ളി റോഡ് നിർമാണം മുടങ്ങി; പാതയോരവാസികൾ ദുരിതത്തിൽ

*പൊളിച്ചിട്ട റോഡിൽനിന്ന്​ പൊടിപടലം ഉയരുന്നത്​​ പരിസരവാസികൾക്ക്​ ദുരിതമായി കരുനാഗപ്പള്ളി: സമയബന്ധിതമായി നിർമാണം പൂർത്തീകരിക്കാത്തതിനാൽ പുതിയകാവ് ചക്കുവള്ളി റോഡിന്‍റെ ഇരുഭാഗത്തുമുള്ള ജനം ദുരിതത്തിൽ. കാട്ടിൽക്കടവ്-പത്തനാപുരം തീരദേശ, മലയോര സംസ്ഥാന ഹൈവേ വികസനത്തിന്‍റെ ഭാഗമായാണ് കാട്ടിൽകടവ്-ചക്കുവള്ളി റോഡിന് 16 കോടി രൂപയുടെ പദ്ധതി നടപ്പാക്കാൻ മുൻ എൽ.ഡി.എഫ് സർക്കാർ തീരുമാനിച്ചത്. എം.എൽ.എമാരായിരുന്ന ആർ. രാമചന്ദ്രൻ, കോവൂർ കുഞ്ഞുമോൻ എന്നിവർ മുൻകൈയെടുത്ത് പൊതുമരാമത്ത് മന്ത്രിയായിരുന്ന ജി. സുധാകരന്‍റെ ശ്രദ്ധയിൽ കൊണ്ടുവന്നതോടെയാണ് പദ്ധതിക്ക്​ പണം അനുവദിച്ചത്. റോഡിന്‍റെ കരാറെടുത്ത കമ്പനി പണിക്കായി വിവിധ ഭാഗങ്ങൾ പൊളിച്ചിടുകയും നിർമാണപ്രവർത്തനം ഒരുഘട്ടം വരെ മുന്നോട്ടുപോവുകയും ചെയ്തു. ടാറിങ് ജോലികൾ പൂർത്തീകരിക്കുന്നതിന് തൊട്ടുമുമ്പ് തൊടിയൂർ പാലത്തിന്​ സമീപം ദീർഘനാളായി പ്രവർത്തിച്ചുവന്ന ടാർ മിക്സിങ് യൂനിറ്റ് പ്രദേശവാസികളുടെ എതിർപ്പിനെതുടർന്ന് അടച്ചുപൂട്ടേണ്ടിവന്നു. ഇതോടെ റോഡിന്‍റെ ടാറിങ് നടപടികൾ പൂർത്തിയാക്കാൻ കഴിയാത്ത സ്ഥിതിയായി. പൊളിച്ചിട്ട റോഡിൽ പലഭാഗത്തും ചിപ്സും മെറ്റലും ഉൾപ്പെടെ മിശ്രിതം നിരത്തിയ നിലയിലാണ്​. വേനലായതോടെ വാഹനങ്ങൾ കടന്നുപോകുമ്പോൾ വൻതോതിൽ പൊടിപടലം ഉയരുന്നത്​​ റോഡിന് ഇരുഭാഗത്തുമുള്ള താമസക്കാർക്കും കച്ചവടക്കാർക്കും ദുരിതമായി. റോഡിന്‍റെ പലഭാഗവും വെട്ടിപ്പൊളിച്ചതിനാൽ ഇതുവഴിയുള്ള ഗതാഗതവും ദുഷ്കരമാണ്​. ബന്ധപ്പെട്ട അധികൃതരുടെ യോഗം വിളിച്ച്​ കരാറുകാരനുമായുള്ള പ്രശ്നങ്ങൾ ചർച്ചയിലൂടെ പരിഹരിച്ച്​ റോഡ് നിർമാണം അടിയന്തരമായി പൂർത്തീകരിക്കണമെന്ന്​ നാട്ടുകാർ ആവശ്യപ്പെടുന്നു. കാപ്​ഷൻ: നിർമാണം പാതിവഴിക്ക്​ മുടങ്ങിയ പുതിയകാവ്-ചക്കുവള്ളി റോഡിന്റെ ഭാഗം