കുടിവെള്ളം എത്തിക്കും

കുണ്ടറ: നിയോജകമണ്ഡലത്തിലെ കുടിവെള്ള ക്ഷാമം രൂക്ഷമായ പഞ്ചായത്തുകളിൽ ടാങ്കർ ലോറികളിൽ കുടിവെള്ളമെത്തിക്കാൻ കലക്ടർക്ക് നിർദേശം നൽകുമെന്ന് മന്ത്രി കെ. രാജൻ അറിയിച്ചു. കുടിവെള്ള ക്ഷാമം പരിഹരിക്കാൻ നടപടി സ്വീകരിക്കണമെന്നാവശ്യപ്പെട്ട്​ പി.സി. വിഷ്ണുനാഥ് എം.എൽ.എ നിയമസഭയിൽ ഉന്നയിച്ച സബ്മിഷന് മറുപടി പറയുകയായിരുന്നു മന്ത്രി. കുണ്ടറ നിയോജകമണ്ഡലത്തിൽ വാട്ടർ അതോറിറ്റി പമ്പിങ് സംബന്ധമായ തകരാറുകൾ പരിഹരിക്കണമെന്നും കുഴൽ കിണറുകളുടെ നിർമാണത്തിനുള്ള ഫീസിബിലിറ്റി റിപ്പോർട്ട് വേഗത്തിൽ നൽകണമെന്നും വിഷ്ണുനാഥ്‌ ആവശ്യപ്പെട്ടു. റോഡുകൾ മുറിച്ച് വാട്ടർ കണക്​ഷനുകൾ നൽകുന്നതിന് പൊതുമരാമത്ത് വകുപ്പുമായി ഏകോപിപ്പിച്ച് അടിയന്തര നടപടികൾ സ്വീകരിക്കുമെന്ന് മന്ത്രി റോഷി അഗസ്റ്റിൻ ഉറപ്പുനൽകിയതായി എം.എൽ.എ അറിയിച്ചു.