നാടണഞ്ഞ ആശ്വാസത്തിൽ ആരോൺ

ചാത്തന്നൂർ: യുദ്ധഭൂമിയിൽ​ നാട്ടിലെത്തിയതി‍ൻെറ ആശ്വാസത്തിലാണ്​ രണ്ടാംവർഷ മെഡിക്കൽ വിദ്യാർഥിയായ ആരോൺ ജോഷി. കിയവിലെ ബോഗോമൊലെത്​സ്​ നാഷനൽ മെഡിക്കൽ യൂനിവേഴ്സിറ്റി വിദ്യാർഥിയാണ്. കീവ് വിടാൻ എംബസിയുടെ മുന്നറിയിപ്പ് വന്നതോടെ ട്രെയിനിൽ സ്ലോവാക്യയുടെ അതിർത്തിയിലെത്തുകയായിരുന്നു. യൂനിവേഴ്​സിറ്റിയിലെ അഞ്ഞൂറോളം ഇന്ത്യൻ വിദ്യാർഥികൾ മൂന്ന് സംഘമായി ട്രെയിനിലും ബസുകളിലുമായാണ്‌ സ്ഥലം വിട്ടത്. സ്ലോവാക്യ അതിർത്തിയിൽ ഭക്ഷണവുമായി ഇന്ത്യക്കാരും വിദേശകാര്യ ഉദ്യോഗസ്ഥരും കാത്തുനിന്നു. ഹോട്ടലിൽ താമസ സൗകര്യവും ലഭിച്ചു. തുടർന്ന്​ സുരക്ഷിതനായി ഇന്ത്യയിലേക്ക്​ മടങ്ങിയ ആരോൺ ഇന്നലെ പുലർച്ചെ അഞ്ചരക്കാണ്​​ വീട്ടിലെത്തിയത്​. ചാത്തന്നൂർ കാരംകോട് കാരിമാൻതോട്ട് വീട്ടിൽ ജോഷിയുടെയും മുത്തൂറ്റ് ബാങ്ക് മാനേജർ ഷീബയുടെയും മകനാണ്. ആൽവിൻ ജോഷി സഹോദരനാണ്.