ചിൽഡ്രൻസ് പാർക്ക് നടത്തിപ്പ്​ ​വൻകിട സംരംഭകർക്ക്​ കൈമാറാൻ ഡി.ടി.പി.സി നീക്കമെന്ന്​

കൊല്ലം: ചിൽഡ്രൻസ് പാർക്കുമായി ബന്ധപ്പെട്ട്​ ഗുരുതര വീഴ്ച വരുത്തുന്ന ഡി.ടി.പി.സി അധികൃതർ തങ്ങളെ ഒഴിവാക്കി, പാർക്ക്നടത്തിപ്പ്​ വൻകിട സംരംഭകർക്ക്​ കൈമാറുന്നതിനുള്ള നടപടികൾ ആരംഭിച്ചതായി 'ഗോൾഡൺ എന്‍റർടെയ്​ൻമെന്‍റ്​' നടത്തിപ്പുകാർ വാർത്തസമ്മേളനത്തിൽ കുറ്റപ്പെടുത്തി. 2013 ഒക്ടോബർ മുതൽ അഞ്ചുവർഷത്തേക്കും പിന്നീട് ഓരോ വർഷം വീതവുമായി കരാർ നീട്ടുകയായിരുന്നു. പാർക്കിലെ റൈഡ് വരുമാനത്തിന്‍റെ 65:35 അനുപാതത്തിൽ വീതം വെക്കണമെന്നായിരുന്നു വ്യവസ്ഥ. പ്രവേശന വരുമാനം മുഴുവനും ഡി.ടി.പി.സിക്കാണ്​. പാർക്കിലെ നിർമാണപ്രവർത്തനങ്ങൾ, പുതിയ റൈഡുകൾ സ്ഥാപിക്കൽ, സ്വിമ്മിങ്​ പൂളിലെ നിർമാണപ്രവർത്തനങ്ങൾ ഇതിനെല്ലാമായി 2.5 കോടി ചെലവാക്കിയിട്ടുണ്ട്. ഇപ്പോൾ തങ്ങളെ ഒഴിവാക്കി വൻകിട സംരംഭകർക്ക്​ നടത്തിപ്പ്​ കൈമാറുമെന്ന്​ സെക്രട്ടറിയും മറ്റ്​ അധികൃതരും ഭീഷണിപ്പെടുത്തുകയാണ്​. കരാർ വ്യവസ്ഥ ലംഘിച്ച്, വർഷങ്ങളായി വാടകവിഹിതം നൽകുന്നുമില്ല. പുതുക്കിയ രണ്ടാമത്തെ വർഷം തുടങ്ങുമ്പോഴാണ്​ കോവിഡ്-19 തുടങ്ങുന്നത്. ഇതോടെ, 14 മാസം പാർക്ക് അടച്ചിട്ടു. മൂന്നുമാസം പ്രവർത്തനസമയം രാവിലെ 10 മുതൽ വൈകീട്ട് അഞ്ച്​ വരെയും. പാർക്ക് തുറന്ന്​ കൂടുതലായി ആളുകൾ വരാൻ തുടങ്ങിയതോടെയാണ്​ തങ്ങളെ ഒഴിവാക്കാനുള്ള നീക്കം തുടങ്ങിയത്​. തങ്ങളുടെ മുടക്കുമുതൽ തിരി​െക ലഭിക്കുന്നതിനായി കരാർ പുതുക്കി നൽകുകയോ തങ്ങൾ സ്ഥാപിച്ചിട്ടുള്ള ഉപകരണങ്ങളുടെയും വൈദ്യുതി കണക്​ഷന്​ ചെലവായ തുകയടക്കം നഷ്ടപരിഹാരം നൽകുകയോ വേണമെന്ന്​ അവർ ആവശ്യപ്പെട്ടു. അജിത്​ കുമാർ, അനിത അജിത്​, ഗിരീഷ്​ കുമാർ എന്നിവർ വാർത്തസമ്മേളനത്തിൽ പ​​ങ്കെടുത്തു.