അഞ്ച്​ നൂറ്റാണ്ടിലേറെ പഴക്കമുള്ള പാവുമ്പ കല്ലുപാലം പുരാവസ്തുവകുപ്പ് ഏറ്റെടുക്കുന്നു

കരുനാഗപ്പള്ളി: പാവുമ്പ വില്ലേജിൽ പാവുമ്പ ക്ഷേത്രത്തിനുസമീപം നൂറ്റാണ്ടുകളായി സ്ഥിതിചെയ്യുന്ന പാവുമ്പ കല്ലുപാലത്തിന് ശാപമോഷം. പ്രാധാന്യം കണക്കിലെടുത്ത് പുരാവസ്തു വകുപ്പിന്‍റെ സംരക്ഷിത സ്മാരകമാക്കാൻ തീരുമാനമായതായി സി.ആർ. മഹേഷ് എം.എൽ.എ അറിയിച്ചു. രാജഭരണ കാലത്താണ് ഒറ്റക്കല്ലിൽ പാലം നിർമിച്ചത്. വെള്ളാരംകല്ലുകൾ ആണ് നിർമാണത്തിന് ഉപയോഗിച്ചിരുന്നത്​. 500 വർഷത്തിലേറെ പാലത്തിന് പഴക്കമുണ്ടെന്നാണ് പഴമക്കാർ പറയുന്നത്. ചരിത്രപ്രാധാന്യം ഏറെയുള്ള പാവുമ്പാ കല്ലുപാലം പ്രളയത്തിൽ തകർന്നുപോകുമോ എന്ന ആശങ്ക നാട്ടുകാർക്ക് ഉണ്ടായിരുന്നു. പാലത്തിന്‍റെ ചരിത്രപ്രാധാന്യം നഷ്ടപ്പെടാതിരിക്കാനും സംരക്ഷിക്കാനും പാവുമ്പ സുനിൽ ചെയർമാനും മേലോട്ട്​ പ്രസന്നകുമാർ കൺവീനറും ഐക്കര ഗോപാലകൃഷ്ണൻ രക്ഷാധികാരിയുമായി വാർഡ് മെംബർ കെ. കൃഷ്ണകുമാറിന്റെയും നേതൃത്വത്തിൽ ആക്​ഷൻ കൗൺസിൽ പ്രവർത്തിച്ചിരുന്നു. ഇത് സംബന്ധിച്ച ആവശ്യം ഉന്നയിച്ച്​ എം.എൽ.എ നിരവധി തവണ വകുപ്പ് മന്ത്രി അഹമ്മദ് ദേവർകോവിലിന് കത്ത് നൽകുകയും ചെയ്തതിന്‍റെ അടിസ്ഥാനത്തിലാണ് പാലം ഏറ്റെടുക്കാൻ തീരുമാനമായത്. ചിത്രം: കരുനാഗപ്പള്ളിയിലെ പാവുമ്പ ക്ഷേത്രത്തിന് സമീപം പള്ളിക്കലാറിന്‍റെ കൈവഴിക്ക് കുറുകെയുള്ള നൂറ്റാണ്ട്​ പഴക്കമുള്ള പുരാതന പാലം