സ്കൂൾ സമയത്ത് പാഞ്ഞ ടിപ്പറുകൾ നാട്ടുകാർ തടഞ്ഞു

പുനലൂർ: സ്കൂൾ സമയത്ത് അമിതലോഡുമായി പാഞ്ഞെത്തിയ ടിപ്പറുകൾ നാട്ടുകാർ തടഞ്ഞ് തെന്മല പൊലീസിൽ ഏൽപിച്ചു. ദേശീയപാതയിൽ ആര്യങ്കാവ് ഹൈസ്കൂൾ ജങ്ഷനിലും ചെക്പോസ്റ്റ് ഭാഗത്തുമാണ് ടിപ്പറുകൾ തടഞ്ഞത്. തമിഴ്നാട്ടിൽ നിന്ന്​ പാറയുമായി വന്നതായിരുന്നു ടിപ്പറുകൾ. കഴിഞ്ഞ ദിവസം സ്കൂൾ സമയത്ത് ടിപ്പറുകൾ നിർത്തിയിടണമെന്ന് ഇവിടുള്ളവർ ഡ്രൈവർമാർക്ക് മുന്നറിയിപ്പ് നൽകിയിരുന്നു. ഇതും അവഗണിച്ചാണ് ഒമ്പതുമണിയോടെ നാല്​ ടിപ്പറുകൾ കടന്നുവന്നത്. പൊലീസെത്തി ടിപ്പറുകൾ കസ്റ്റഡിയിലെടുത്തു. പിഴയീടാക്കിയ ശേഷം ഡ്രൈവർമാർക്ക് താക്കീത് നൽകി പിന്നീട് വിട്ടയച്ചു. ഇരുനൂറോളം ടിപ്പറുകൾ ഇതുവഴി പാറ ഉൽപന്നങ്ങളുമായി ദിവസവും തമിഴ്നാട്ടിൽ നിന്ന്​ വരുന്നുണ്ട്. ദിവസവും എല്ലാ സമയത്തും അമിതവേഗത്തിൽ കടന്നുവരുന്ന ഈ ടിപ്പറുകൾ കാൽനടക്കാർക്കും മറ്റും വലിയ ഭീഷണിയായിട്ടുണ്ട്. പുനലൂർ മുതൽ ആര്യങ്കാവ് വരെ ഒരു ഡസനിലധികം സ്കൂളുകൾ ദേശീയപാതയോരത്തുണ്ട്. പഠനമുള്ള ദിവസങ്ങളിൽ രാവിലെയും വൈകീട്ടും പാതയിൽ കുട്ടികളുടെ അമിതമായ തിരക്കും അനുഭവപ്പെടുന്നു. സ്കൂളുകളുടെ മുന്നിൽ കുട്ടികളുടെ സുരക്ഷക്കായി പൊലീസ് സേവനമടക്കം സംവിധാനവുമില്ല.