കൂട്ടിക്കട മേൽപാലം: റെയിൽ​േവ അനുമതി ലഭിച്ചാലുടൻ സ്ഥലം ഏറ്റെടുക്കും

ഇരവിപുരം: ഗതാഗതക്കുരുക്കിൽ വീർപ്പുമുട്ടുന്ന കൂട്ടിക്കടയിൽ റെയിൽ​േവയുടെ അനുമതി ലഭിച്ചാലുടൻ മേൽപാലത്തിനുള്ള സ്ഥലം ഏറ്റെടുക്കൽ നടപടികൾ ആരംഭിക്കും. മയ്യനാട് പഞ്ചായത്തും കൊല്ലം കോർപറേഷനുമായി അതിർത്തി പങ്കിടുന്ന കൂട്ടിക്കടയിൽ റെയിൽ​േവ ഗേറ്റ് അടക്കുമ്പോഴും തുറക്കുമ്പോഴും വാഹനങ്ങളുടെ നീണ്ട നിരയും ഗതാഗതക്കുരുക്കും പതിവുകാഴ്ചയായിരുന്നു. വിഷയം എം. നൗഷാദ് എം.എൽ.എ സർക്കാറിന്റെ ശ്രദ്ധയിൽപെടുത്തിയതിനെ തുടർന്ന് മേൽപാലത്തിനായി കിഫ്ബി 52. 24 കോടി അനുവദിക്കുകയായിരുന്നു. മൂന്ന് പ്ലാനുകളാണ് നിർവഹണ ഏജൻസിയായ റോഡ്സ് ആൻഡ്​ ബ്രിഡ്​ജസ് ​െഡവലപ്​മെന്റ് കോർപറേഷൻ സർവേ നടത്തി തയാറാക്കിയിട്ടുള്ളത്. ജങ്​ഷന് തെക്കും വടക്കുമായി ഓരോ പ്ലാനുകളും ജങ്​ഷൻ ഉൾപ്പെടുത്തിക്കൊണ്ടുള്ള ഒരു പ്ലാനുമാണ് തയാറായിട്ടുള്ളത്. മേൽപാലത്തിന്റെ ജനറൽ അറേഞ്ച്മൻെറ് ഡ്രായിങ്​ നാലുമാസം മുമ്പുതന്നെ റെയിൽവേക്ക്​ സമർപ്പിച്ചിരുന്നു. പ്രദേശവാസികളുടെയും വ്യാപാരികളുടെയും വർഷങ്ങളായുള്ള ആവശ്യമായിരുന്നു കൂട്ടിക്കടയിൽ മേൽപാലം നിർമിക്കുക എന്നത്. ഇരവിപുരം മണ്ഡലത്തിൽ കിഫ്ബിയിൽ ഉൾപ്പെടുത്തി ഇരവിപുരം, മയ്യനാട്, കോളജ് ജങ്​ഷൻ, കല്ലുംതാഴം എന്നിവിടങ്ങളിൽ മേൽപാല നിർമാണത്തിന് നേരത്തേ അനുമതി ലഭിച്ചിരുന്നു. ഇതിൽ ഇരവിപുരം മേൽപാലത്തിന്റെ നിർമാണപ്രവർത്തനങ്ങൾ കഴിഞ്ഞമാസം ആരംഭിച്ചു. പോളയത്തോട് മേൽപാലത്തിന്റെ ഡി.പി.ആർ ഭരണാനുമതിക്കായി കിഫ്ബിയിൽ സമർപ്പിച്ചിട്ടുണ്ടെന്ന്​ എം. നൗഷാദ് എം.എൽ.എ അറിയിച്ചു.